ZONET Chief News Editor Laldingliana a thi

ZONET Cable TV-a chief news editor, Laldingliana Sailo (75) h/o Lalhrangzuali Sailo, Mission Vengthlang chu nimin zing dar 7:25 khan thisen cancer (leukemia) vangin Grace Nursing Home-ah a thi a, nimin chawhnu khan an inah vui a ni.

July 15, 1944-a piang Laldingliana Sailo hi Indian Information Service (IIS) a ni a, India hmarchhak state hrang hrangah leh New Delhi-ahte thawkin, chanchin thar a khawih ṭhin. Laldinliana hi kum 1983 aṭangin All India Radio, Aizawlah a thawk ṭan a, New Delhi-ahte a thawh leh hnuah AIR, Aizawlah news editor a ni. February 1997 aṭangin Doordarshan Kendra, Aizawlah news editor niin kum 2006-a a pension thlengin a thawk. DDK, Aizawl a enkawl lai hian director thlengin a kai hman a, Mizoram bakah, state dangte pawh a enkawl tel.

Sorkar aṭanga a pension hnuah 2006 kum tawp lam aṭangin ZONET Cable TV-ah news section a enkawl zui a, chief news editor a ni. A nuna news zawn leh ziah bet tlat a nih avangin cancer a vei tih hmuh a nih thlengin ZONET-ah news a ziak a, accredited journalist leh MJA member a ni.

Laldingliana Sailo hian March thla vel aṭangin insawiselna a neih avangin April 2, 2019-ah CMC, Vellore panpui a ni a, thisen cancer a nei tih hriat chhuah niin, Vellore-ah enkawl nghal a ni. In lama inenkawl turin June 3 khan an haw a, June 4-ah Grace Nursing Home-ah dah luh a ni a, nimin zing khan a thi a ni.