By-election-ah Tluang takin vote thlak

Lai Autonomous District Council (LADC) chhunga Lungtian MDC constituency leh Chakma Autonomous District Council (CADC)-a Ugudasury South MDC constituency-a by-election chu June 6, Ningani khan neih a ni a, tluang takin vote thlak a ni.

By-election atan hian zing dar 7 aṭangin vote thlak ṭan a ni a, tlai dar 5 thleng vote thlak a ni. Polling station pali awmna LADC-a Lungtian MDC constituency-ah voter 1,510 an awm a, vote 1,188 (79%) a tla. Polling station pahnih awmna CADC-a Ugudasury Suoth MDC constituency-ah voter 1,544 an awm a, vote 1,469 (95%) a tla a ni.

Vote thlak hun a tawp hnuah vote thlakna electronic voting machine (EVM)-te chu Lawngtlai DC complex-a strong room panpui nghal a ni a; vote tlate chu vawiin chawhma dar 10 aṭangin Lawngtlai BDO BNRGSK Hall-ah chhiar a ni ang.