Aizawlah plastic thenfai hnatlang neih a ni

Aizawl Municipal Corporation (AMC) bul tumin nimin khan World Environment Day pualin Aizawl khawpuiah plastic aṭanga thil siamte chhar thenfai hnatlang huaihawt a ni a, hnatlang hi New Market-ah minister Dr R Lalthangliana’n 

a hawng.

Dr R Lalthangliana chuan, ram changkang leh hriselna lama ke pên apiangin faina leh taksa tana ṭha lo tur thianfai zawnga hmalak an uar thu a sawi a, “Aizawlah damdawi dawr a tam hle a, hei hian kan hrisel tâwk lo tih a tichiang. Ram changkang apiangah damdawi dawr a tlem ṭhin. Hriselna lama thawktu indaih loh thu kan sawi ṭhin a, hrisel ila chuan thawktu indaih lohna hi a ziaawm ang,” a ti.

India rama smart city atana thlan zingah Aizawl a tel chu lawmawm a tih thu sawiin R Lalthangliana chuan, “Smart city-in a tum chu khawpui felfai ṭha neih a ni a, sum pawh an rawn phalrai viau. Mahse, a nih tur angin kan la kalpui lo deuh a ni mai thei,” a ti a; National Green Tribunal-in October 2, 2019 aṭangin smart city zawng zawngah plastic bag pan chi a khap dawn thu a sawi.

AMC mayor PC Lalhmingthanga pawhin thu sawiin, AMC-in plastic bag chungchang a zir chian tawh thu a sawi a, “Kan vela nungchate leh keimahni tan  pawha pawi khawpin plastic kan hmang tawh tih hmuh a ni. Plastic hman tlem a nih theihna atan theihtawpin hma kan la a, kohhrante pawh hmang tlem turin kan ngen a, No Plastic Exhibition-te kan buatsaih a ni,” a ti.

AMC Mayor chuan August 1, 2019 aṭanga Aizawl khawpuia plastic micron 50 aia pan zawrh leh hman khap a nih dawn thu sawiin, chutih hunah chuan polythene, thermocol leh bottle-ahte an khauh leh zual tur thu a sawi. Plastic bawlhhlawh chi hrang hrang thenfai hnatlang hi Aizawl khawpuia local council 83-in an huam chhung ṭheuhah an buatsaih a, sikul hrang hranga NSS-te’n lui leh kawra plastic-te an chhar khawm thung. Plastic chhar khawmte chu Tuiriala AMC dumping ground-a a paihna tur hmun bikah dah a ni a, la hralh leh tura ruahman a ni.