Larsapin Mizoram mamawh a thlen

President Ram Nath Kovind chuan nimin khan video conference hmangin state leh union territory tina governor leh lieutenant governor-te Covid-19 donaa an hmalak dan a sawipui.

Mizoram Governor PS Sreedharan Pillai telin, Mizoram hmalaknate a sawi a, Mizoramin a mamawh zinga pawimawh zualte a thlen nghal. Video Conferencing-ah hian state leh UT tin governor leh lt.governor-te chu thu sawina hun minute ruk ṭheuh pek an ni a; Larsap Shreedharan Pillai chuan, Mizoram chu Covid-19 donaah a harh hmasa pawl a nih thu sawiin, "PM Narendra Modi-a'n Janata Curfew a puan hma kar hnih vel aṭangin chak taka hmalak a ni.

Lockdown kalpui a nih hnuah pawh hmun dang angin sorkar ruahmanna kalh zawnga hma la an awm lo. Sorkar hmalakna mipuiin an thláwp ṭha hle," a ti. Kohhranin sorkar hmalakna an thláwp pumhlûm tih sawiin Governor chuan,"Biak-ina inkhawmte titâwp vekin, puipunna programme zawng zawng an titawp nghal vek. Local level task forcete'n hma lain mipui mamawh an pe ṭhin," a ti a; Mizoramah mi 2,000 chuang thu âwih takin in lamah an inkhung hran thu te, Covid-19 vei mi pakhat awm chu ṭha taka enkawl a nih thute a sawi.

PS Shreedharan Pillai chuan, Mizoram awmna a kilkhâwr avangin mamawh lâk khawm a harsat thu a sawi a, "Mamawh langsar zual deuh chu Covid-19 testing laboratory, medical equipment, PPE leh mask-te a ni a, harsatna min sutkianpui turin sorkar laipui ka ngen nghal a ni," a ti. President chuan, governor leh lt. governor-te chu an state/UT chhunga thil thleng leh hmalaknate uluk taka vila hre chiang turin a chah a; sakhaw hruaitute leh NGO hruaitute pawh mipui zirtirna kawngah an mawhphurhnate hriattir zel turin a chah bawk.