KHAWTHLIR

Planning deputy adviser Dr Lalrinchhana chuan nimin khan Lunglei High Powered Committee (HPC) pisa conference hall-ah Lunglei HPC-in an kalpui tur business plan intihsiakna, ‘Lei­tlangpui Rahbi’ chung­chang thuthar thehdarhtute leh entrepreneurship master trainer-te a hrilhfiah. Intihsiaknaah hian sumdawnna bul ṭanna atan Rs. 2,50,000 thlenga puihna dawn theih a ni. Dr Lalrinchhana sawi danin, sorkar hnathawk nghet ni lo chu a duh apiang tel theih a ni.

Secretariat-a thawkte chuan nimin khan chief secretary Lalnunmawia Chuaungo kaihhruaina hnuaiah World Environment Day pualin thutiam an chham rual. Assembly Secretariat-ah pawh secretary SR Zokhuma kaihhruainain thutiam an chham rual bawk.

Traffic SP Rodingliana Chawngthu chuan thupek chhuahin, Ramrikawn aṭanga Sakawrtuichhun kaltlanga NH-54 (Lungverh pêng) kawngpuiah lirthei lian (HMV), rit phur lote chu tlai dar 6 aṭanga a tûk zing dar 6 inkarah chhuk zawnga tlan phal a nih thu a puang. He thupek hi June 10, 2019-a hman ṭan tur a ni. Chutih laiin, thupek awm tawh sa angin, NH-54 Lungverh pêng aṭangin Ramrikawn lam panin HMV reng reng tlân chhoh phal a ni lo tih a tarlang bawk.

Economics and Statistics department chuan, nimin khan district hrang hrangah 7th. Economics Census atan supervisor leh enumerator-te pualin training an buatsaih. 7th. Economic Census hi Mi­nistry of Statistics and Programme Implementation leh CSC e-Governance Service India, Ltd. tan an buaipui dawn a, Mizoramah chuan Economics and Statistics kaihhruaina hnuaiah CSC-te'n an buaipui dawn a ni.

Mizoram Fisheries Technical Service Association chuan nimin khan khawmpui an hmang chhunzawm a; an rorel zingah, lui sangha zir chian a, state páwn a­ṭanga sangha chî (no) lo lut thunun dan kawng zawn leh, technical post hrang hrang ruakte a theih anga hnawhkhah an duh thu a tel. Kum 2019-21 chhung­a an office bearer tur an thlang a, president atan K Lalmalsawma leh general secretary atan Lalsiam­liana te an thlang a ni.