New Market main building a him lo A luahtute chhuah a ngai dawn

Aizawl New Market main building-a dawr neitute chu an awmna building a him tâwk loh thu leh, hmun danga eizawnna zawng tura hriattir an ni dawn.

Commerce & Industries minister Dr R Lalthangliana chuan nimin khan New Market main building a tlawh a, a enfiah a ni. Minister chuan, Aizawl District Disaster Management Authority (ADDMA)-in building an enfiah hnuah, a him tâwk loa an hriat avangin dawr neitute chu an awmna building a him tâwk loh thu hrilh turin Commer & Industries department hotute a chah a ni.

Dr R Lalthangliana chuan, New Market main building-ah mi tam takin ei an zawn thu sawiin, "Tun dinhmunah an awm lailâwkna tur a awm mai si lo a, tihluihnaa inchhuahtir chu thil tih chi a ni lo. Chuvangin, an awmna hmun a him tâwk loh thu leh a him loh dan chiang takin hrilh ni se a ṭha," a ti.

Commerce & Industries director J Hmingthanmawia sawi danin, ADDMA-in building him tâwk loa an ngaih avangin January 30, 2017 khan building him tâwk loh thu chu dawr neitute an hriattir tawh a, mahse, tumah an chhuak lo. ADDMA chuan building chu ṭhiaha sak ṭhat emaw, major repair turin rawtna an siam a ni.

Hetih lai hian, building him lo zual lai chhinchhiah a ni a, chuta dawr neite chu building tharah seng luh an ni dawn. New Market main building-ah hian mi 1,073-in dawr an nei a ni.