Zirlai pass tharte chawimawina hun hmang

Minister C Lalrinsanga chuan nimin khan MZP Sub-Headquarters, West Phaileng-in an khua aṭanga kumina HSLC leh HSSLC-a pass-te chawimawina an buatsaih a hmanpui a, government deputy chief whip Lalrintluanga Sailo, MLA a tel bawk. HSLC pass thar mi 46 leh HSSLC pass thar mi 36 hnenah chawimawina hlan a ni.

Minister C Lalrinsanga chuan, zirlaite chu tum mumal tak neia zir turin a chah a, "Vai ho kan hria, civil service an tum chu an naupang têt aṭanga hlawhtlinna turin theihtawp an chhuah ṭhin. Rual el nachang an hria a, eng dinhmunah pawh ding se, an tumruhnain hlawhtlinnaah a hruai ṭhin. Mizote pawhin tumruhna nen theihtawp chhuah ila, hnam dang tih theih chu ti ve theia bul ṭan kan ngai a ni," a ti.

MZP Headquarters, Mamit pawhin nimin khan Mamit Chhimveng YMA Hall-ah zirlai ti ṭhate chawimawina an buatsaih a, bialtu MLA H Lalzirliana khuallian a ni. MLA chuan, taima taka zirte tan hlawh­tlinna a awm thu sawiin, "Mi vannei kan tih te, mi hlawhtling leh hausa tak takte pawh harsatna tam tak paltlang leh taima taka thawk ṭhinte an ni," a ti. H Lalzirliana hian a pa H Thanzauva hriat reng nan a biala zirlai HSLC leh HSSLC pass zawng zawngte tana a buatsaih 'Upa H Thanzauva Award' chu zirlaite hnenah a hlan a ni.