World Food Safety Day hman a ni

Nimin, June 7 kha khawvel pumah ei tur vawn thianghlim leh ei leh in hriselna inzirtirna ní, World Food Safety Day a ni. He ni hi Aizawlah pawh hmangin, Health Services directorate-a thawkte'n zing lamah thutiam an chham rual a, chhunah Health principal director Dr F Lallianhlira hoin a pisaah hun hman leh a ni.

World Food Safety Day hmanna kaihruaitu Dr F Lallianhlira chuan, mipui­in ei leh in thianghlim a pawimawhzia an hriat theih nana Health department-a thawkte'n ṭan an lak nasat a ṭul thu leh, kumina Day thupui 'Food safety, everyone business' tih chu a pawimawh thu a sawi.

Health Services joint director (Food & Drugs Administration) Lalsawma Pachuau-in powerpoint presentation hun a hmang a; World Food Safety Day chu UNO thutlukna angin Mizoramah a ṭum khatna atan hman a nih thu sawiin, "Kum tin he ní hi ei leh in thianghlim chungchanga inzirtirna hun atan hman chhunzawm zel tum a ni," a ti.

Lalsawma sawi danin, khawvelah kum tin ei leh in thianghlim lo aṭanga natna kai mi nuai 6,000 chuang an awm ziaha chhût a ni a, mi 10 zela pakhatin ei leh in thianghlim lo vangin natna an kai ṭhin. Kum tin naupang kum 5 hnuai lam 40%-in ei tur thianghlim lo an ei vangin natna an vei ziah a, ei leh in thianghlim lo ei vangin kum tin mi 1,25,000 an thi ziaha chhût a ni bawk.