KHAWTHLIR
COVID-19 MOBILE APPS TLANGZARH
Information & Communication Technology minister Robert Romawia Royte chuan nimin khan a pisaah Covid-19 chungchanga hriat tur hrang hrang dah khawmna Covid-19 Mobile Application a tlangzarh. Application hi ICT department-a engineer-te'n sorkar sum hmang loa an siam a ni a, hmang turin mcovid19.mizoram.gov.in ah luh a, download tur a ni.
HMA SAWN RIH
Covid-19 vei, State Referral Hospital ICU-a enkawl mek chuan hma a sawn a; Covid-19 vei nia rinhlelh enkawl mekte pawh an ngaihtuaha wm lo tih State Referral Hospital-ZMC thuchhuak chuan a tarlang.
DAY-NULM HMANGIN TANPUI
Mizoram inkharkhip chhunga village/local task force-te'n khua/ venga chhuanchhamte an puihna atana an hman tur in DAY-NULM hnuaia self help group leh area federation 31-te chuan an pawisa khawl aṭangin an awmnaa task force-te hnenah Rs. 48,800 an pe.
MDC TE NGEN
LADC sorkara chief executive member T Zakunga chuan, Covid-19 donaah nasa leh zualin ram hruaitute an ṭan a ngaih thu sawiin, LADCa member (MDC) zawng zawng chu an bial chhung ṭheuh tlawh chhuak a, mipui din hmun hre turin a ngen a; "Bial mipui harsatna sukiang tur leh an natnate hnêma an harsatna eng emaw chen sukiang tura che chhuak hmanhmawh turin kan inngen a ni," a ti.
NSS-TE INPE
Aizawl khawpui chhunga NSS volunteerte chu Covid-19 dona kal zelah Aizawl DC Pisapui nen an thawkho dawn a, sorkarin quarantine centre a siama awm mekte ei leh in tur an pe ṭhin dawn. PUC-a NSS-te'n R Dengṭhuama Hall-a dah mi 50 vel an vil dawn a, Hrangbana College NSS-te'n Berawtlang, Govt. Aizawl College NSS-te'n Youth Hostel, Luangmuala khung hran mekte chaw an pe ṭhin dawn. Nimin khan an ti ṭan a, April 14, 2020 vel thleng an duty ang.
SANGHA MANTU MAN
Phuaibuang Branch YMA chuan Luangpawn branch YMA-te nen Tuivai lui an humhalh chhungah April 1, 2020 khan sangha man ru mi 12 an man a, sangha an manna hmanrua an tihchhiatsak nghal. An mi mante chu Luangpàwn khaw mi pasarih leh Pàwlráng khaw mi panga an ni. Phuaibuang leh Luangpawn YMA-te hian Tuivai lui an humhalh a, an invèn chhâwk ṭhin a ni.