MPYCC-in harsatna denchhena sumdawngah sorkar an puh

Mizoram Pradesh Youth Congress Committee (MPYCC) chuan thuchhuah siamin, Covid-19 vanga Mizoramin hun harsa leh khirh a tawh mek denchhenin Mizoram sorkarin sumdawn nan mipuite a hmang nia an hriat thu leh hriatthiam har an tih thu an tarlang.

MPYCC chuan, Covid-19 hri léng laka invenna atana Mizoram pumah inkharkhip mek a nih avanga mipui harsatna chhâwk zângkhaina tura sorkarin Vegetable Supply Chain Programme a kalpui hmanga Serchhip aṭanga thlai/ zîkhlûm lak leh local task force hnena  hralh leh a nih dana sawi sep sep a awm chu pawi an tih thu an sawi.

Congress ṭhalaite chuan, zîkhlûm kg. khat zelah sorkarin Rs. 10-15 hlêpa a hralh chhàwn laiin, local task forcete'n an vengah hlêp awm loin mipui an leitir a, veng ṭhenkhatah chuan a thlâwnin an sem tih an tarlang a; "Sum tamzia sawi reng ṭhin CM Pu Zoramthanga department chan hnuaia mipui mamawhna denchhena mipui hnena hlêp ûma chêt a ni hi a rilru nat thlak.

Kut hnathawktute'n an thawhrim rah tél tho sia mipuiin thlai thar man man zawka an lei theihna tura hma la turin sorkar kan phût a ni," an ti.