Myanmar tualchhung buaina vangin Mizoramah mi 12 an rawn lut tawh

March 3, 2021 khan mi pathum chuan Myanmar ram tlanchhiatsanin Serchhip district-ah an lut a ni. Mi pathumte hian Myanmar police an nih thu leh Dawn khua aṭanga rawn lut an nih thu sawiin, "Police-te chu mipui leh sipai inkarah dahin, civil mite kutthlak tur leh a ṭul chuan ralthuam hmang tura tih kan ni. Hei hi duh loin Mizoram lamah kan rawn tlanchhe ta a ni," an ti. 

Mi pathumte sawi danin, bike hmangin Ṭiau lui thleng an ṭhiante'n an thlah a, Ṭiau aṭangin balu laa kal Lungkawlh khaw motor hmangin Mizoramah an lut a ni. 

Thu dawn danin, an pathumin Lungkawlh community hall-ah dah an ni a, Covid-19 an vei leh vei loh Rapid Antigen Test hmanga enfiah nghal a ni. North Vanlaiphai aṭangin police leh district thuneitute'n an buaipui nghal a ni. 

Serchhip district aṭang vêk hian Myanmar mi leh sa mi panga chuan nimin khan Mizoram an rawn lut bawk. Lungkawlh YMA hruaitute hnen aṭanga thu dawn danin, nimina Mizorama rawn lutte chu sipai pathum an ni a, sipai pakhatin a nupui leh a fa sén a hruai a ni. 

Sipai pahnihte chu nimin tlai thleng khan Lungkawlhah enkawl an la ni a, mi dang pathum - sipai pakhat leh a nupui leh a fate erawh chuan N Vanlaiphaiah chhungte an nei tih sawiin, nimin khan N Vanlaiphaia an chhungte bèl turin an kal nghal. 

N Vanlaiphai SDO (Civil) Dorothy Muan­sangi chuan, Myanmar aṭanga rawn lutte chu a ṭul anga buaipui an nih thu a sawi a, "Thu­neitu sang lamah report pek a ni tawh," a ti.

Myanmar aṭang hian Champhaiah pawh nimin thleng khan mi pali an lut tawh a; mi pathum chuan Kalay (Kalaymyo) aṭanga rawn kal niin an insawi a, pakhat chuan Tamu aṭanga rawn kal niin a insawi thung. 

Ráltlânte hian February 28 leh March 1 khan Champhai an thleng a, DPRC building-ah dah an nih hnuah nimin khan DIET-ah sawn an ni a, an awm zel dan tur chu la ngaihtuah leh tur a ni. 

Hetih lai hian, Ministry of External Affairs (MEA) leh Ministry of Defence (MoD) aṭanga Assam Rifles-in thu an dawn angin, Myanmar aṭangin Mizoramah luh phal a nih loh thu AR-te chuan an sawi. 

Assam Rifles ho thu sawi chungchangah hian Champhai DC Maria CT Zuali chuan thu chiang zawk hriat a tum mek a, MHA Joint Secretary (North East) chu meeting-ah a la tel char char rih avangin biakpawh theih a ni rih lo. Thu chiang zawk hriat a nih hma chuan Myanmar ráltlânte chu Mizorama lut rih lo turin Champhai DC chuan a ngen. 

Hetih lai hian, Champhai Bawrhsap hian March 2, 2021 khan thuchhuah siamin, Myanmar buaina avanga ráltlân Champhai district-a lut an awma dawnsawn dan tur a tichhuak tawh a; YMA Sub-Headquarters, Champhai pawhin Myanmar-a Zo hnahthlak, Mizorama ráltlân an awm chuan thinlung taka an lo pawm dawn thu an puang tawh a ni.