COVID-19: Mizoram dinhmun Hripui vei hmuh chhuah belh lo

March 3, Nilaini khan Mizoramah mi 577-te swab sample endik ni mah se, Covid-19 vei hmuh chhuah an awm lo a; nimin khan hripui laka fihlim tawh mi pahnih chu SRH-ZMC aṭangin chhuahtir an ni.

Nilaini khan ZMC laboratory-ah swab sample 45, TrueNAT-PCR hmangin Champhaiah sample pakhat leh RAT hmangin district pariatah sample 530 endik a ni a, a vaiin sample 577 a ni. Mizorama swab sample endik tawh zat chu 2,35,319 a ni a, chu'ng aṭanga Covid-19 positive hmuh tawh zat 4,427 chu 1.88% a ni.

Mizoramah Covid-19 vei mi 4,427 hmuh chhuah a ni tawh a, mipa 3,230 leh hmeichhia 1,197 an ni. Nimin tlai dar 5 thleng khan mi 4,400 (99.39%) chhuahtir an ni tawh a, mi 10 (0.23%) thi tawhin, enkawl mek mi 17 (0.38%) an awm. 

Hripui vei hmuh tawh zinga mi 2,112 chu Mizo­ram chhunga kái chhâwng an ni a, mi 2,315 chu Mizoram páwn aṭanga an rawn luh hnua hmuh chhuah an ni thung. District 11 zinga paruk Siaha, Kolasib, Serchhip, Lawngtlai, Khawzawl leh Hnahthial district-ahte Covid-19 vei an awm tawh rih lo.