Vanapa Hall-ah Chapchar Kût

Vawiin hi Chapchar Kût a ni a, hmun ṭhen­khatah hman ni dawn mah se, Covid-19 hripui léng avangin kum dang angin lian tham taka hman a ni dawn lo. Kumina kût thupui chu 'Zo nun ze mawi - thuawihna' tih a ni.

Chapchar Kût hi Aizawlah chuan Vanapa Hall-ah chawhma dar 11-ah hman a ni dawn a, chief minister Zoramthanga kût pa a ni dawn a, Art & Culture minister R Lalzirliana kût thlengtu a ni ang. Vanapa Hall-ah hian hun rei tak hman a ni dawn lo a, thusawi bakah, hlado, zaipawl, malzai leh Cheraw pakhat ṭheuh chiah a awm.

Vanapa Hall-a hun hman zawh veleh virtual programme-a chhun­zawm a ni dawn a, Chap­char Kût puala thil chi hrang hrang tih tawh (record)-te chu TV-ah pek chhuah a ni ang a, zai leh làm bakah thil chi hrang hrang en tur a awm ang.

Chapchar Kût hi district khawpui dangah pawh a huhoa hman a ni dawn lo a; chutih rualin, district thuneitute chuan mahni in lamah kût puala hun hmang turin chhungkua leh mimalte an ngen hlawm a ni.