Covid vaccine pek mek zel a ni

Covid-19 hripui laka invenna damdawi (vaccine) Covishield chu pek chhunzawm zel a ni a, March 3, Nilaini thlengin mi 28,350 hnenah first dose leh mi 9,036 hnenah second dose pek a ni tawh. Tunlai hian mi hrang hrang hnenah first dose pek mek a ni a, chief minister Zoramthanga leh ram hruaitu dangte pawh nimin khan pek a ni.

Covid vaccine hi pek hmasak ber - healthcare worker-te chu first dose pek kim an ni ṭêp tawh a, a tam zawk chu second dose pawh pek an ni tawh. Frontline worker-te first dose pek mek an ni a, kum 60 chung lamte leh kum 45-60 inkar, natna benvawn neite pawh first dose pek ṭan an ni tawh a, second dose erawh pek ṭan a la ni lo.

March 3, Nilaini khan healthcare worker mi 47 hnenah vaccine first dose leh mi 944 hnenah second dose pek a ni a, frontline worker mi 1,389, kum 45-60 inkar, natna benvawn nei 43 leh kum 60 chung lam mi 1,497 hnenah first dose pek a ni. Nimin khan mi eng emaw zat hnenah vaccine pek leh a ni a, pek zat erawh hriat theih a ni rih lo a, table-ah pawh hian tarlan tel a ni lo.

Covid vaccine hi first dose bik chu March 3, Nilaini thleng khan healthcare worker 11,412, frontline worker 13,672, kum 45-60 zinga natna nei sa mi 54 leh kum 60 chung lam mi 3,212 pek a ni tawh a; healthcare worker mi 9,036 hnenah second dose pek a ni tawh bawk.