KHAWTHLIR

Mizoram PYD, Serchhip Bial chuan PYD Day pualin nimin khan Serchhip District Hospital tan thisen unit 25 an pe a, petute mipa 19 leh hmeichhia paruk an ni. PYD (NEI), Aibawk bial pawhin PYD Day pualin ZMC blood bank tan unit 24 an pe a, petute mipa 17 leh hmeichhia pasarih an ni. 

MzSRLM leh Mission Foundation Movement (PIA) chuan March 3-4 chhung khan Start-up Village Entrepreneurship Development Programme (SVEP) hnuaiah Kolasib DRDA conference hall-ah baking technician training an buatsaih a, Bilkhawthlir RD Block-a entrepreneur mi 22-te chhang ur an zirtir. SVEP-in a tum chu, mahni kutkawiha eizawnna bul ṭan duhte puih a ni a, Kolasib district-ah target 800 neiin, chuta tan chuan RD Ministry-in cheng nuai 431 a ruahman a ni.

Kàwlbêm khuaa sial vultute tan nimin khan FOCUS hmalaknain sial in leh tuikhur siamte hawn a ni. Undivided Champhai district-ah sial vulh khaw 20 an awm a, heng zinga khaw 10 thlan hmasak - Kawlbem, Vangtlang, Hnahlan, Tualcheng, Khuangleng, Lianpui, Sazep, Vangchhia, Samthang leh Farkawn-a Sial vulhtute hnenah FOCUS project kaltlangin  Sial vulh ṭanpuina leh chhawmdawlna pek chhuah a ni. 

Lawngtlai DC Dr Andrew H Vanlaldika chuan nimin khan Chengpawng lí leh a chhehvela khuahkhirhna thupek a tichhuak a; Chhimtuipui luia Chengpawng lí chu Lawngtlai khawpuia mipui tui tlan tur lâkna pui ber a nih avangin tuia chên, insûk, lirthei sil leh intihhlim khap a nih thu a puang. Thupek hi thla hnih awh tur a ni a, thupek zâwm lote chu hrem theih an ni.

State Referral Hospital-ah nimin tlai dar 5 dinhmun angin, Covid-19 vei mi pakua enkawl mek niin, hripui laka fihlim tawh mi pathum an awm bawk. SRH-ZMC Bulletin tarlan danin, Covid-19 vei enkawlte chu Isolation ward-ah an awm a, hripui laka fihlim tawh mi pathumte chu ICU Extension-ah awmin, an zinga pakhat chu ventilator hmantir mek a ni.