Rei lo têah AR an chhuah ka ring - Revenue Minister

Land Revenue & Settlement (LRS) minister Lalruatkima chuan, Aizawla awm Assam Rifles-te chu hun rei lo te hnuah khawpui lailí aṭangin an insawn chhuah a rin thu Assembly House a hrilh.

MNF member Dr Vanlal­ṭanpuia zawhna kal zelah Lalruatkima chuan, AR-te chu kum 2006 khan ram hectare 524-a zau Zokhawsangah ram pek an nih thu sawiin, "An insawnna tura ruahman a ni. Kum 2002 khan Aizawla AR ram sorkar leh vantlangin ṭha taka an hman theih turin dan siam a ni a, mimal thil ti thei deuhte'n an neih lohna atan," a ti.

LRS Minister chuan, kum 2019 khan AR-te chu Ministry of Home Affairs (MHA)-in lehkha pein, insawn tura ruahmanna siam rang turin a tih thu sawiin, "State sorkar pawhin tih tur a nei ve a, tui, êng leh kawng ṭha pek niin, tih zawh a ni tawh. AR-te harsatna pakhat chu contractor-te'n duh angin hna an thawk chak thei lo hi a ni," a ti a, state sorkarin theihtawp a chhuah thu a sawi.

Revenue Minister chuan, AR-te chu March 2020 khan Zokhawsanga insawn tura tih an nih leh thu sawiin, "Covid-19 avangin thil a kal chak thei lo. Ka mimal ngaihdanah chuan hun rei lo têah an chhuakin ka ring," a ti.

MZU Southern Campus hmun tur chungchangah LRS Minister chuan, "Campus atan hian Mausep ram, Pukpui VC area, Lunglei district chu Higher & Technical Education department leh Pukpui VC-te'n an thlang a, mimal ram awm lohna nia hriat a nih avangin aqcuired tura notification chhuah tawh chu ni 22.12.2020 khan revoked a ni," a ti a; land lease dil turin HTE department hmalakna nghah mek a nih thu a sawi.