Mizoram Engineering College function turin cheng vbc. 11 vel a ngai - HTE Minister

Higher & Technical Education (HTE) minister Dr R Lalthangliana chuan, Lunglei Pukpuiah Mizoram Engineering College class kalpui ṭan turin cheng vbc. 11 vel a ngaih tur thu a sawi.

HTE Minister chuan ZPM member C Lalsawi­vunga zawhna kal zelah Mizoram Engineering College chu a tak taka kalpui ṭan a buaithlak thu sawiin, "RUSA pawisain building hrang hrangte sak a ni. Mahse, approach road pawh a awm lo a, in sak lai hian a buaithlak khawpin ka ring. Power supply leh tui pawh a awm lo. Faculty lakna tur provision pawh a awm lo hrim hrim," a ti.

Mizoram Engineering College kalpui ṭan turin cheng vbc. 11 vel ngaia chhût a nih thu sawiin R Lalthangliana chuan, "Kan Chief Minister pawhin a ngai pawimawh. Mahse, Covid-19 in mi tlakbuak a, sum a harsa chho a, class kal theih a ni ta lo," a ti a; MZU Southern Campus nena bul ṭan kawp dan tur an ngaihtuah thu a sawi.

HTE Minister chuan, technical course zirlaite tan book grant leh stipend kum 2012-13 session aṭangin pek tawh loh a nih thu sawiin, "August 11, 2012 khan khatih laia Cabinet khan Ministry of Tribal Affairs, Minority Affairs leh NEC aṭanga hmuh thei tho a nih avangin plan fund aṭanga stipend pek tihtawp an rél a ni. Sorkar hmasain a tihtluk tawh a nih avang leh sum harsatna avangin tih leh mai pawh a harsa ang reng," a ti.