Mizoram PYD Day hman a ni

Mizoram UPC kohhran ṭhalai pawl, Pentecostal Youth Department (PYD) chuan nimin khan an din champha vawi 60-na, PYD Day an hmang.

PYD Day hi tualchhung kohhran leh biala Mizoram PYD-te'n an remchan angin an hmang a, hmun tam zawkah chuan khawtlang tana thil ṭha tihna hun atan hmangin, vantlang hmunhmate an tihfai bakah, hmun hrang hrangah thilpek an hlàn.

Mamit district leh Serchhip district-a PYD te, Khawzawl Vengthar Bial PYD leh Ruantlang Bial PYD-te chuan nimin khan thisen an pe. PYD Day pual hian Mizoram hmun hrang hrangah thisen pek rûnpui nei turin ruahmanna an siam a, Aizawlah chuan March 6, Inrinni hian Aizawl leh a chhehvela PYD-te'n thisen pek rûnpui an nei dawn a, General PYD chuan thisen pe vek turin an member-te an sáwm a ni.