Lunglei district-a vaccine pek dan sawiho
Lunglei District Task Force for Immunization (DTFI) chu nimin khan an chairman R Vanrengpuia, additional DC hoin a pisaah an ṭhu a; Lunglei district-a Intensified Mission Indradhanush (IMI) 3.0 thawh khatnaa hmalakna leh Covid-19 vaccine pek mek chungchang leh hmalak zel dan tur sawiho.
Lunglei district immunization officer Dr Lalrinthangi'n Covid-19 healthcare worker leh frontline worker-te hnenah Covid-19 vaccine dose khatna leh hnihna pek tawh dan a sawi a; village task force, kum upa leh natna khirhkhàn zual neite hnena hri danna pek dan tur an sawiho a ni.
Ṭhutkhawma tarlan danin, IMI 3.0 thawh khatna chu Cherhlun damdawi-in (PHC) huam chhunga khaw pahniha naupang 11 hnenah pek vek tawh a ni a; Tlabung damdawi-in huam chhunga khaw 16-ah naupang 31 leh nu nau pâi 10-te pawh vaccine pek vek tawh an ni bawk.
Covid-19 hri danna chu January 16, 2021 aṭangin Lunglei district-a healthcare worker, ASHA leh anganwadi worker mi 1,544-te hnenah first dose pek a ni a, second dose pawh mi 1,276-in an la tawh a, frontline worker (BSF leh Assam Rifles) mi 2,117 hnenah first dose pek a ni tawh.
Frontline worker dang, VTF-te hnenah March 6, 2021 aṭangin BCM Lunglei Venglai sande sikul hall leh BCM Chanmari sande sikul hall-ah vaccine pek tura ruahman a ni a; kum 60 chung lam leh kum 45-59 inkar natna khirh neite pawh Christian Hospital, Serkawnah hri danna pek mek zel a ni.
Covid-19 vaccine hi Lunglei district-a sub-centre tina emaw community hall-ah emaw pek tura ruahman a ni a, private hospital-a sorkarin Covid vaccine pe tura a thlanah Rs. 250 cháwia lâk theih a ni bawk.