District hqrs.-ah gas home delivery tih tum

Food, Civil Supplies & Consumer Affairs (FCSCA) minister K Lalrinliana chuan ZPM member Dr Vanlalthlana zawhna chhángin, district khawpuiah gas home delivery tih tum a nih thu Assembly House a hrilh.

FCSCA minister chuan, Aizawl ni lo, district khawpui dangah pawh kumin aṭangin gas home delivery tih tum a nih thu sawiin, "Kolasib khawpui chhungah kalpui tum mek a ni a, district khawpui dangah pawh kalpui tura ruahmanna siam mek a ni. LPG connection hi dan pangngaiah chuan pakhat aia tam a neih theih lo a, a theih dan kawng erawh a awm," a ti.

Gas connection thar ti turin February 15, 2021 ang chuan single connection-ah Rs. 4,775 leh double connection-ah Rs. 6,850 chawi tur a nih thu sawiin K Lalrinliana chuan, "Hei hi LPG filled cylinder rate a danglam dan azirin a danglam zel ṭhin," a ti a; gas connection thar siamin gas stove lei tel kher a ngaih loh thu a sawi bawk.

Dr Vanlalthlana chuan, tun hnaia gas connection mi dang tihsak avanga Rs. 8,000 chawitir an awm thu sawiin, "Cash memo min pe thei lo a, ka tihsakte'n khin kher an duh tâk loh avangin kan khing lo. Mi hnuaihnung zawk tam tak chu gas stove leh a behbâwm dang an lei luihtir ṭhin. Hei hi tihtawp a nih theihna atan khawng takin notification a tihchhuah theih ang em?" tiin a zawt a ni.

FCSCA Minister chuan, Dr Vanlalthlana thusawi chu thil ṭul tak a nih thu sawiin, "Mi harsa leh hnuaihnung zawkte'n nasa takin an tuar ṭhin. Dan ang takin khauh takin notification chhuah kan tum ang," tiin a chháng.