Silai chungchanga sorkar thuchhuak

Home department chuan nimin khan silai leh silai license zawrh leh lei chungchangah thuchhuah a siam a; dan zàwm lote chu silai license tihtawpsak theih an nih thu an tarlang.

Sorkar thuchhuah tarlan danin, silai license neitute'n silai license nei tho mi dang hnen aṭangin silai an lei emaw, an hralh dawn emaw a nih chuan license lai ngei an neih ve ve a ngai a; a leitu turin silai lei phalna a neih a ngai bawk. An awmna district magistrate phalna la hmasain, an silai lei emaw, hralh emaw chu an license ve veah magistrate-in a ziak lut tur a ni.

Danin a phal ang ni loa silai leh a license zawrh te, license chauh zawrh te, license nei lo hnena silai hralhte phal loh a ni a, mahni hminga license nei loa silai kawl chu kum thum thleng tàntir theih a ni. Mahni hminga silai license neite chauhin silai an kawl thiang a; Arms Rules, 2016 hman a nih aṭangin mimalin mi dang silai retainer anga an kawl theih ṭhin pawh tihtawp a ni tawh.