Supplementary Demand sawiho loh Mipuite chanvo rahbehsaknaah puh

Zoram Peoples' Movement (ZPM) PAC member TBC Lalvenchhunga chuan nimin khan Champhai Press Club-ah thuthar thehdarhtute a kâwm a; Assembly House-ah Supplementary Demand sawiho loha pass chu mipui chanvo rahbehsakna a nih thu a sawi.

TBC Lalvenchhunga chuan, Finance changtu Chief Minister-in House-ah nikum (FY 2020-21) sum mamawh belh dilna a pharh chu kum dang ang thoin Speaker-in sawihona hun hawng loin House pawmpui turin a diltir nia sawiin, "Mipui tana sum hman tur chu mipui aiawh a thlante'n sawihona hun nei loa sum tam tak hman a ni ṭhin hi mipui hian kan hriat a ṭul," a ti.

Indian Constitution Article 202-206 ah Annual Financial Statement kalphung a inziak tih sawiin TBC Lalvenchhunga chuan, "Sum hmanna hlâwm lian pahnih - charged leh voted expenditure pawh hi sawiho theih loh ni loin, danpui chuan charged expenditure hi vote tura pharh tur a ni lo a, sawiho turin khuahkhirhna erawh a siam lo," a ti a; Supplementary Demand pass tâkah chhinchhiah tlak leh mipui hriat àwm ngawih ngawih tam tak a awm thu a sawi. 

TBC Lalvenchhunga chuan, Chief Minister-in budget a pharhnaah, "Nikum 2020-21 budget estimate kan pharh lai khan khawvel pumpui chu sawi loh, Mizoram pawhin hetiang sum leh páia tlakchhiatna hi kan tawk ang tih rin lâwk ngaihna reng reng kan hre lo,' tia a sawi thu a sawi a, "Hei hi dikna chen awm mah se, India ram economy-in kum 2017 aṭangin hniam lam a pan tawh a, kum 2019-20 ah phei chuan GDP 4%-ah a tla thla tawh a ni," a ti. 

Covid-19 hripuiin India ram economy a nghawng nasat thu sawiin Lalvenchhunga chuan, "GDP pawh negative (-) 8% a ni tawh. Chuvangin, India ram chhiah aṭanga sum kan hmuh ve tura beisei pawh vbc. 1185 laiin kan hmu pha ta lo a ni. Sorkar laipuiin inrenchem tura state tin a ngen laiin, central aṭangin sum leh pái ṭhahnem tak kan dawng thung," a ti a; Mizoramin estimate aia sum hmuh tur a phâk lohna chu vbc. 329 chauh a nih thu a sawi.

TBC Lalvenchhunga chuan, Supplementary Demand 2020-21-a sum hmanna dil belh chu cheng vbc. 3058 a nih thu sawiin, "Nikum sum hmanna tur (expenditure estimate) aia kan hman tamna chu vbc. 2061 a ni. Kan sum indaih lohna hi mipui leibá (public debt) hmanga siam remin, vbc. 2094 pûk a lo ni ta a, primary deficit chu vbc. 1805.26 a nih phah ta a ni," a ti.