YMA Day-ah tlawmngaihna inzirtir Central YMA-in an duh
Central YMA chuan YMA Day hi sub. headquarters, group leh branch YMA zawng zawngte chu anmahni huam chhungah YMA Day pual hian hun hmang ṭheuh turin an ngen a, "YMA Day programme kan hman turah hian, heng a hnuaia tarlante hi rilru a hre reng turin kan inngen thar leh a ni," an ti.
YMA Day pual hian CYMA hian Guwahati, Kolkata, Mumbai, Delhi, Chennai, Bangalore, Vellore, Hyderabad, Pune, Silchar, Shillong, Jaipur, Goa, North Bengal leh Allahabad khawpuia Mizo Welfare hnenah Rs. 10,000 ṭheuh an hlan a, Ṭawngṭai Bethel Camping Centre, Sakawrtuichhun hnenah 50,000 man thilpek an hlan bawk.
Central YMA ngenna
• YMA DAY 2019 thupui atan ‘Ram leh Hnam humhalh’ hman ni se.
• YMA Day-ah hian sub headquarters/group/branch huam chhung hmun rem laiah YMA flag a ngul sang taka zar chhuah.
• YMA hi ṭanpui ngaite ṭanpui tura pawl din a nih angin, veng/khaw chhunga mi harsa leh chhumchhiate dap chhuak a, a theih ang anga ṭanpui. Chenna in thawm
ṭhat ngai leh khawsak harsa zualte dap chhuak a, a theih leh remchan anga chhawmdawl.
• Dam lo mangang ṭanpui ngaite thisen pek. Faina leh thianghlimna hi YMA-ten kalphung ngheta kan lo neih tlat tawh angin, he ni pual hian veng chhung thenfai hnatlang a remchan dana neih.
• Hospital/Home/Centre-ah te YMA Day puala ṭanpuina thilpek hlan. YMA in, library, lungphun, signboard leh thil dangte tuai thar.
• Ṭhangtharteah tlawmngaihna inzirtir thar leh nan leh Mizo thuam inbel uar tura ṭan lak nana hman
• YMA Day hman dan hi Central YMA office-ah report theh luh.