BJP-in MNF nen an inzawm thu an puang

Mizoram BJP hruaitute chuan Inrinni khan an pisa-ah thuthar thehdarhtute an kawm a, BJP leh MNF chu National Democratic Alliance (NDA) ah an thawh dun thu an sawi a, MNF president Zoramthanga chu hmai phihna atana BJP zawm lo anga insawiah an puh. Mizoram BJP chuan MNF chu BJP nen an inkar thua dawt sawi kual reng loa an duh a nih chuan NDA chhuahsan law law mai turin an hriattir.

BJP general secretary Vanlalhmuaka chuan May 28, 2019 tlaia Parliament Central Hall-a NDA-BJP kaihhruai MP-te kalkhawmnaa BJP president Amit Shah-in prime minister atana Narendra Modi a rawt ṭumin MNF chu a thlawptu zingah an tel thu sawiin, "MNF chu NDA, BJP kaihhruai lam an nih thu MNF President hian a sawi dan a ni," a ti.

Vanlalhmuaka chuan, MNF President-in tun hnaia  'BJP kan ṭan ngai lo' a tih chu, "BJP chuan sawifiah ngaiin kan hria," a ti a, MNF-in tun hma aṭanga tun thlenga BJP kaihhruai sorkar a thlawp tawh dan leh an thawhho dan hrang hrangte a sawi chhuak.

BJP Mizoram chuan, "Kum 1998 chhoa NDA- BJP kaihhruai, AB Vajpayee sorkar, BJP sorkar hmasa ber kha MNF Mizorama sorkar mek khan a zu support a, khatih hun laia kan MP Vanlalzawma pawh kha MNF party aṭanga thlan tlin a ni nghe nghe a ni. He mi hre chiangtu chu Mizoram mipuite mai ni loin, political history-ah hmuh tur a awm," an ti.

Vanlalhmuaka chuan tuna Mizoram chief minister hian kum 2014 MP inthlan dawnah pawh khan MNF chu, "NDA- BJP kaihhruaia a tel thu a sawi kha kan bengah a la cham reng mai ni loin, mithlaah pawh a la cham," a ti a, MNF-in BJP sorkar a thlawp tih chu, "Mizoram mipui hi a hretu kan ni," a ti.

BJP Mizoram secre­­tary chuan MNF presi­dent thu sawi ṭhin dan sawi chhâwngin, "UPA khu Congress in a kaihhruai inhlawm khawm an ni a, NDA khu BJP-in an kaihhruai inhlawm khawm an ni, tiin a sawifiah a. MNF chu NDA – BJP kaihhruai lam an nih thu MNF President hian a sawi dan a ni," a ti a, MNF-in BJP a thlawp thu hi Zoramthanga hian a sawi fo tawh niin a sawi.

MNF leh BJP-te in­kungkaih dan point panga an tarlan hnuah Mizoram BJP chuan, "Heti chunga 'BJP kan ṭan ngai lo' tia Mizoram mipui hriata khaw eng pawh zah map loa a la sawi pap pap ngam hi, 'Pathian leh kan ram tan' titu party tan chuan thil inhmeh lo tak a ni. Dawt hul hual a ni bawk," tiin MNF president Zoramthanga thusawi chu an chhang a ni.

BJP Mizoram chuan MNF chu, "Dawt sual kual reng loin an duh a nih chuan NDA sorkar, BJP kaihhruai an thlawpna chu Mizoram mipui hmaah ni loin NDA sorkar, BJP kaihhruai mekah inhnukdawk mai rawh se," an ti a, he thu hi, "Media kal tlangin MNF president Zoramthanga, chief minister ni bawk hi kan hriattir a ni," an ti.