Sorkarin MPS tan secretary post pakhat a pe

Mizoram sorkar chuan Mizoram Police Service (MPS) officer tan Mizoram sorkarah secretary post pakhat a pe thar. Hetih lai hian, MPS officer tana Mizoram Home Guard & Civil Defence (HGCD)-a director general post lo siam tawh chu sût a ni.

MPS tana Mizoram sorkara secretary post pek chungchangah hian DP&AR chuan June 7, 2019 khan notification a tichhuak. Notification-a a lan danin, secretary post hi MPS Supertime Grade-A chin tan luah theih a ni. MPS Association (MPSA) president Lalbiakzama chuan, sorkarin MPS officer tana secretary post pakhat a siam thar chu an lawm thu a sawi a; chutih rualin, HGCD-a director general post, MPS tana siamsak chu Cabinet thutlukna angin ṭhiah a nih thu Vanglaini a hrilh.

MPSA President sawi danin, HGCD-a director general post, MPS officer tana siam hi kum 2014-ah kalpui ṭan a ni a, mahse, Mizoram Ex-Service League-te'n an dodal a, Court-ah khin a nih avangin a takin director general post chu an luah mai lo a, an luah hmain ṭhiah a ni a, sorkar chuan secretary post a pe ta zawk a ni.

Thu dawn danin, Mizoram sorkar hnuaia service parukin secretary post an nei. Post nei tam ber Mizoram Civil Service-in post pali an nei a, Mizoram Engineering Service-in secretary post pakhat an neih rualin, secretary post ni lo, secretary rank post (engineer-in-chief) dang pathum an nei tel.

Secretary post hi Mizoram Secretariat Service (MSS)-in post pahnih, Mizoram Finance & Accounts Service (MF&AS)-in post pakhat, Mizoram Judicial Service (MJS)-in post pakhat an nei bawk.