Chief Minister-in Airport tihchangtlunna tur a enfiah
Inrinni khan chief minister Zoramthanga chuan Lengpui Airport tlawhin, airport tichang-tlunna tura hmalakna kal mekte Airport Authority of India (AAI) aiawhte leh Aviation hotute nen an enfiah.
Chief Minister hian runway tihsei belh theih dan tur te, runway khawk tawh leh rualrem lo lai cheiṭhat dan turte leh Doppler Very High Frequency Omni Range (DVOR) thar bunna tur Hmunpui tlanga mite enfiah nghal a ni.
Sorkar thuchhuah tarlan danin, Lengpui Airport hi chei ṭhat mek a ni a, kum 2018 aṭanga hnathawh ṭan a ni. DoNER aṭanga sum hmuhin a daih loh avangin la zawh loh a ni. Chief Minister hian state aṭangin sum engzat nge he hna zo tur hian sen belh ngai dawn tihte a enfiah nghal a ni.
Lengpui Airport-a hnathawk mekte:
• Extension of Apron: Thlawhtheihna park-na area zauhna
• Isolation Parking Bay: Thlawhtheihna hijack emaw chhiatna dang a thlen thulha airport a thlawhna dang tibuai lo a, a hranga park tirna tur hmun siam.
• Runway End Safety Area: Thlawhtheihna thlawk chhuak tur engine fail a awm palh pawha accident a thlen loh nana runway tawpa zawl thui zawka siam
• Additional DVOR: DVOR hi Long Range Navigational Aid a ni a, runway bula awm mek bakah airport bul lawk Hmunpui khaw tlangchhip a vuah tura hmalak mek a ni.