KHAWTHLIR

PHE department chuan Inrinni khan Rawpui-chhipah faina chung-chang inzirtirna, bawlh-hlawh bawm sem leh Children Sanitation Club dinna hun buatsaih a ni. Rawpuichhipa Children Sanitation Club-ah hian naupang 200 chuang an tel a, khawtlang hruaitute, PHE dept. staff, Environment & Forest dept. leh NGO hrang hrangte chu thing phunin an hnatlang nghal a ni.

Bawngkawn Pastor Bial KṬP chuan Inrinni khan an kohhran hall-ah blood donation camp an huaihawt a, Synod Hospital Blood Bank tan thisen unit 32 an pe. Thisen petute mipa 30 leh hmeichhia pahnih an ni.

Hnahthial Sub Division MJA chuan High Po­wered Committee (HPC) member atana ruat thar Lunglei District MJA president H Lalthansanga chu PWD IB, Hnahthialah lawmpuina an hlan. MJA member-te chuan HPC member atana District MJA President ruat a ni chu lawmawm an tih thu leh MJA te chawimawina ropui tak a nih thu an sawi.

AH & Vety minister Dr K Beichhua chuan June 8, 2019 tlai khan Lengpuia Rural Animal Health Centre (RAHC) leh mimalin an din hatchery farm a tlawh a, staff quarter sak ṭhat turte a enfiah. Khawtlang hruaitute chuan AH & Vety Minister hnenah hian RAHC chu dispensary-a hlan kai an duh thu an thlen.

Mizorama Baptist Church of Mizoram (BCM) biak-in 678-na tur Thenzawl Tualvungi Venga BCM Gosen kohhran leh biak-in thar chu June 7, Zirtawpni khan BCM president Rev. PC Lianduna'n a hawng.

Luangmual Multipurpose Co-Operative Society(LMCS) Ltd. chuan Inrinni khan Youth Hostel, Luangmualah inkhawmpui an hmang a, an hun hmanpuitu khuallian Cooperation minister C Lalrinsanga chuan cooperation movement chu mihringte hmasawnna tura thawhhona awmze nei Pathianin mihringte hman ṭangkai tura dah a nih thu sawiin, "Cooperation society hnuaia mi tam tak, hmasawn tuma intelkhawmte chuan ram tan hmasawnna an la thlen dawn a ni," a ti.