Police zu ruia puhna thudik a ni lo - MPSOA

Mizoram Police Subordinate Officers' Association (MPSOA) chuan thuchhuah siamin, tun hnaia social media kaltlanga Bawng­kawn Police Station kawta police duty leh mi ṭhenkhat intihbuaina ni awm tak video clip leh thu thehdarh chungchangah thudik hailan a nih theih nan June 7, 2019 khan extended emergent meeting an koh thu an tarlang a, police pakhat zu rui anga tarlan chu thudik a nih loh thu an sawi.

MPSOA tarlan danin, consta­ble zu rim nam chunga duty anga puhna hi dawt chiang tak a ni. Buaina a thlena tleirawl rual buaina siamtua puhte Bawngkawn PS-a hruai an nih lai hian PS kawtah SRS member leh mi engngemaw zat an pung khawm tawh a ni. Mahni office kawt kaia buaina lian zawk a thlen belh hlauin Bawngkawn PS duty-te chuan pungkhawmte chu inbengdai a, buaina leh bengchheng siam lo turin an hrilh a ni.

Police constable pakhat zu in lo zu rim nam tia dawta an puh hi constable Zonunmawia a ni a, amah hi zu leh ruihtheih thila buai lo, City Police zinga discipline tha leh rintlak tak a ni. Amaherawhchu, mipui lam aṭanga zu rim nam anga sawi leh police station chhunga luh chilha a service tichhe thei an nih thu hial vauna a awm takah chuan Bawngkawn PS O/C leh duty officer-te chuan breath analyser an ham tir a, a result-ah chuan zu far khat pawh a in lo tih finfiah a ni. 

MPSOA chuan an thawhhona thuthlung anga theihtawpa inlungruala ruihhlo an do mek laia Central YMA (SRS) leh Police department inkara hem thlaka police duty zu rim nama puh chu an ngaihthiam loh thu sawiin, "Mipui vantlang hriata mimal leh pawl tihmingchhe tura dawta in puh hi India danah sual lian tak a ni a, a hremna pawh IPC Section 500-na hnuaiah kum hnih thleng lung in tan emaw, pawisa chawitir emaw, a inkawp emawa hrem theih a ni," a ti a, he thil hi an thlir liam dawn loh thu an sawi.