UESI-NE-in Aizawlah khawmpui an hmang

Union of Evangelical Students of India (UESI), North East chuan June 6-8 chhung khan Agape Camping Centre, Dur­tlangah khawmpui an hmang a, hmarchhak state hrang hrang aṭangin zirlai leh zirtirtu mi 100 vel an kalkhawm.

June 7 khan ro an rel a, UESI-in hma a lak mekte leh rawngbawlna zau zawk leh chak zawk neih theih nana hmachhawpte sawiho a ni. Rorel inkhawmah hian Zonal secretary leh hmarchhak state pariat aṭangin staff-worker-te'n report an pe a ni.

Zan inkhawmah con­ference speaker Rev. V Laldingliana chuan 'Chhiahhlawh ni chunga hruaitu hna' tih thupui hmangin Pathian thuchah a sawi a ni. UESI hi September 18,1954- khan Pre­sidency College, Mad­ras-a professor Han­nington Enoch din a ni a, pawl thil tum chu post-matric zirlaite Lal Isua hnungzuitu ṭha tak an lo nih a, kohran leh khawtlangah mi ṭangkai zawk nih tir a ni.

UESI-NE hnuaiah bik hian unit 252 (affiliated unit 123 leh functional unit 129) ah member 4911 an awm a, Evangilical Graduate Fellowship unit 69 a awm bawk. UESI hruaina ah hian college leh university-a zirlai mi 8500 velin zirna hmunah rawngbawlna hi an hmang ṭhina ngaih a ni a, mi 2898 velin he UESI rawngbawlna avangin Isua an nei tawh a ni.