Thisen lâkah MSHCS zawm lo damdawi-inte khuahkhirh an ni
Mizoram sorkarin Mizoram State Health Care Scheme (MSHCS) hnuaia sorkarin rate a siam zawm duh lo private hospital-te a pawmpuina (empanelment) a hlihsak hnuah, sorkar damdawi-in aṭanga thisen pek chhuah kawngah pawh MSHCS zawm lo damdawi-inte chu a khuahkhirh ṭan.
Health department hotute hnen aṭanga thu dawn danin, Health department chuan Health Care Scheme hnuaia rate siam zawm duh lo mimal leh pawl damdawi-inte'n an damlote hman tur thisen Mizoram sorkar blood bank aṭanga an lâk chungchangah ruahmanna thar an siam a; chuvang chuan, thisen mamawh damlo awm mah se, MSHCS zawm lo damdawi-in tan awlsam takin thisen lâk chhuah theih a ni lo.
Health department hotute'n an rèl dan chuan, MSHCS zawm lo private hospital-te'n sorkar blood bank aṭanga thisen an lak dawnin, Hospital & Medical Education (HME) Director aṭangin phalna an lak hmasak a ngai. Hei hi rêl a nih hnuah hun eng emaw chen chu a taka kalpui a ni lo a; mahse, January 6, Thawhṭanni aṭang khan a tak taka kalpui ṭan nia thu dawn a ni.
Tarlan tawh angin, MSHCS Governing Body hotute October 31, 2019-a ṭhukhawm chuan MSHCS rate zawm thei lo private hospital-te chu empanelment hlihsak (suspend) an rél a, chumi ang chuan December 4, 2019-ah hriattirna
tihchhuah niin, MSHCS rate zawm thei lo damdawi-inte hming tarlan a ni.
Aizawl bikah chuan, private hospital eng emaw zat zingah BN Hospital, Alpha Hospital, Bethesda Hospital (Bawngkawn), JC Eye Hospital leh Nazareth Hospital (Chaltlang)-te chiahin MSHCS rate an zawm thei a; Eye Care, Dawrpuiin an zawm bawk. Private hospital dang zawng chuan an zawm lo nia thu dawn a ni.
Hetih lai hian, thu dawnna pakhat chuan, thisen lak chungchanga MSHCS zawm lo private hospital khuahkhirh chungchangah hian order emaw, notification emaw mumal taka tihchhuah a la awm lo niin a sawi a; Health Secretary erawh chuan TV-in an interview-naah, MSHCS zawm lote chu thisen pek chhuah kawngah khuahkhirh an nih tur thu a lo sawi tawh niin an sawi bawk.
MSHCS zawm lo private hospital hotu pakhat chuan, sorkar blood bank aṭanga thisen lak chungchanga anmahni khuahkhirhna chungchangah hian sorkarin order/notification chhuah ngei se an duh thu a sawi a, "Sorkar blood bank aṭanga thisen kan lak hian private hospital-in kan hmang a ni lo a, a hmangtu chu damlo, thisen mamawhte an ni," a ti a; sorkar kal dan chu pawi an tih thu Vanglaini palai a hrilh.
Thu dawn danin, blood bank din phalna pek te, thisen pek leh a kaihhnawih thil chi hrang hrangte chu State Blood Transfusion Council (SBTC)-in an rél ṭhin a; sorkar damdawi-ina blood processing fee lak chungchang rél hmasatu pawh SBTC a ni. Private hospital ṭhenkhatte'n sorkar blood bank aṭanga thisen an lak chungchanga khuahkhirh chungchang erawh chu SBTC-in an ngaihtuah lo nia thu dawn a ni.
MSHCS zawm lo damdawi-inte
1. Synod Hospital, Durtlang
2. Seventhday Adventist Hospital
3. Greenwood Hospital
4. Ebenezer Hospital
5. Nazareth Medi-Tech Diagnostic & Care Centre, Ramhlun North
6. Vaivenga Hospital & Research Foundation
7. Maraland Gospel Centenary Hospital, Saiha
8. DM Hospital, Champhai
9. City Hospital, Mission Veng
10. Redeem Hospital, College Veng
11. John Williams Hospital, Lunglei
12. Mercy Hospital, Serchhip
13. Grace Nursing Home, Aizawl
14. Aizawl Hospital and Research Centre
15. LRM Hospital, Aizawl