KHAWTHLIR

Aizawla awm Assam Rifles 23 Sector chuan Champhai district-a Daido khuaah Assam Rifles Civic Action Project kal tlangin tun hnai khan infiamna hmanraw hrang hrang an sem. Assam Rifles-te hian Daido Middle School, Presbyterian English School leh Village Council-te hnenah volleyball,  football bungruate leh thil pawimawh dang an pe a ni.

Falkland Veng Branch YMA chuan YMA Day lo thleng tur pualin nimin khan blood donation camp an huaihawt a, Aizawl Civil Hospital tan thisen unit 49 an pe a, a petute mipa 41 leh hmeichhia pariat an ni.

Bilkhawthlir BDO pisa chuan zirna tihmasawnna tur atan Community Education Support Project (CESP) an duang a, chumi hmang chuan an huam chhunga zirnain hma a sawn theih nan self help group leh village organisation (VO) ten hma an la. CESP-in a tum ber chu, Bilkhaw-thlir RD block chhunga zirna tihhmasawn te, zirlaite leh khawtlanga zirna lama inelna thiang-hlim awmtir te, sikul kai rual si sikul kai lo tihtlemte leh zirlaite’n tum mumal neia lehkha an zir theih nana kawng kawhhmuhte a ni.

Lok Sabha MP C Lalrosanga chuan Pathianni khan Doordarshan Kendra, Aizawl station a tlawh a, thawktute chu hnathawh dan leh hmasawnna tur hrang hrang awmte a sawipui. MP hian Doordarshan Kendra buatsaih Pentikos Ni puala TV live programme a hmanpui nghal a ni.

Aizawl Municipal Corporation tirha Goa state-a MJA member Press Study Tour-a kalte report pekna inkhawm chu vawiin chhun dar 12 hian Aizawl Press Club-ah buatsaih a ni dawn a, AMC mayor PC Lalhmingthanga leh AMC hotu dangte’n an hmanpui ang. He hunah hian MJA member-te kal vek tura beisei an ni.