Assembly budget session a ṭiak
Mizoram Legislative Assembly pariatna session vawi ngana, February 17, 2020-a ṭan chu nimin khan a ṭiak ta. Tun ṭum budget session-ah hian kum 2020-21 chhunga Mizoram budget tur cheng vbc. 10,715 pass a ni.
Nimina session-ah Home minister Lalchamliana put luh official resolution - 'That this House ratifies the amendments to the Constitution of India falling within the purview of proviso (d) to clause (2) of article 368, proposed to be made by the Constitution (One Hundred and Twenty Sixth Amendment) Bill, 2019 as passed by both the House of Parliament' tih chu pawm a ni a; he resolution hi scheduled tribe, scheduled caste leh Anglo Indian-te tana Indian Constitution-a reservation siamna pawhseina tur a ni.
Official resolution bakah hian minister pali - Taxation minister Lalchamliana, Land Revenue & Settlement minister Lalruatkima, AH&Vety minister Dr K Beichhua leh Tourism minister Robert Romawia Royte te bill put luh pawm a ni bawk. Speaker Lalrinliana Sailo chuan, session chhunga boruak chhia a awm lo chu lawmawm a tih thu sawiin, "Ram leh mipui tan ṭhahnemngai takin session neih a ni a, a lawmawm hle. Business Advisory Committee rèl ang thlapin kan kal thei a ni. Zawhna chhàn hman loh a awm a, a pawi ka ti. Heng department-te hian an chháng hman lo hrim hrim nge, chhàn ngam loh an nei? Tun hnuah chuan chháng tawh se a ṭha khawp mai," a ti.
Assembly Speaker sawi danin, House-a chhàn chi (starred question)-ah zawhna chhan loh 14 a awm a, a chháng lo department-te chu GAD-in pathum, Commerce & Industries-in pahnih, Sports & Youth Services-in pahnih, Planning department-in pakhat, Land Revenue & Settlement-in pathum, Tourism-in pakhat leh Agriculture-in pahnih a ni. Ziaka chhàn chi (unstarred question)-ah zawhna chhan loh 20 a awm a; a chháng lo department-te chu - GAD-in 14, Agriculture-in pakhat, Labour Employment-in pakhat, Land Revenue-in pakhat, Social Welfare-in pakhat, Power & Electricity-in pakhat leh Finance-in pakhat a ni. Demand sawihona tàwp ní - March 3, Thawhlehni zan khan budget session chu zan dar 10:15 velah tihtawp theih chauh a ni a, minister-te demand zawng zawng chu ruahman sa angin pawm vek a ni.
Session chhunga thil tih tlangpui
• Session ṭan níah Governor PS Sreedharan Pillai-a'n thu a sawi a, a tûkah a thusawia lawmthu sawina pawm a ni.
• Zawhna ziaka chhàn chi 439 a lut a, chung zinga 18 chu hnâwl niin, House-a chhan turin 191 chhawp a ni.
• House-ah starred question 46 chhàn hman a ni a, chhàn hman loh 145 a awm.
• Unstarred question 249 a lut a, chu'ng zinga 19 chu hnâwl a ni.
• Private member resolution 71 a lut a, chu'ng zinga pahnih chu sawiho a nih hnuah tidanglam deuhin an pawm.
• Paper 13 pharh a ni.
• Bill paruk a lut a, sawiho a nih hnuah pass vek a ni.