VC inthlan hun a la hriat loh

LAD minister K Lalrinliana chuan nimina Assembly session-ah, village council (VC) in­thlan hun tur hriat theih a la nih loh thu House a hrilh.

ZPM member Lalduh­oma zawhna kal zelah K Lalrinliana chuan, tuna VC ni mekte chu April 30, 2015-a thlan an nih thu sawiin, "Kumin April 30 hi inthlan leh hun tura ngaih chu a ni. State Election Commission (SEC)-ah hriattirna pek a ni tawh a, hma an la nghal. Electoral roll ennawn a ngaih avangin April 30-ah inthlan an buatsaih hman tur leh tur loh an la chiang lo. A hun tur tihchian a la ni lo," a ti. 

VC thar dilna chu enfiah a nih zel thu sawiin LAD Minister chuan, "VC pek leh pek loh chungchangah sorkarin thutlukna a la siam ang," a ti a; kum 2019-2020 chhungin khua/veng 18-in VC thar an dil thu a sawi. ZPM member C Lal­sawivunga zawhna chhangin K Lalrinliana chuan, village council dinhmun siamṭha turin sorkarin ngaihtuahna a hman mek thu House a hrilh a, "VC leh LC-te lawm­man tihpun pawh VC dinhmun siam ṭhat turah hian ngaihtuah tel mek a ni," a ti.