Chapchar Kût hman a ni. 'Myanmar aṭanga ráltlânte tan Mizoram sorkarin sum a pe' - Kût pa
Mizote kût pui ber Chapchar Kût chu nimin khan Mizoram hmun ṭhenkhatah hman a ni. Aizawlah chuan Vanapa Hall-ah hman a ni a, kût pa Zoramthanga, chief minister chuan, Myanmar ram buaina avanga tlânchhia, Mizorama rawn lutte chhawmdawlna leh an ei turte ngaihtuahna atan Mizoram sorkarin sum a pek thu a sawi.
Kût pa Zoramthanga chuan Zo hnahthlak zawng zawngte Chapchar Kût chibai a bûk a, "Kum dang angin Lammualah ropui taka hman theih a ni lo hi a khawharthlak hle, amaherawhchu, engkim hi Pathian remruat a ni a, kawng lehlama kan ṭhat tlànna turin a ruat a ni tih i hria ang u," a ti.
Zoramthanga chuan, Chapchar Kût chu hmun hrang hranga Zo fate hruai khâwmtu a nih thu sawiin, "Tunah pawh sipai rorelna avangin Myanmar ramah buaina a awm a, mangang takin mi eng emaw zat Mizoram lamah an lo tlanchhia. Ei tur lamah harsatna an neih tâkin tiin sorkar pawhin pawisa kan sanction a, a ṭul ang zelin kan pe dawn a ni," a ti a; anmahni hmuna an kìr leh hma chu an ei turte ngaihtuahsak turin sorkarin sum a pek thu a sawi a ni.
Kût thupui, 'Zo nun ze mawi - thuawihna' chu Mizo mipuiin an nunpui ṭha hlea a hriat thu sawiin Zoramthanga chuan, "Khawvela ram ropui leh hausa, mithiam tam tak neite'n Covid-19 avangin harsatna an tâwk nasa, a chhan ber chu thuawihna an neih loh vang a ni. Keini Mizoram erawh chu India ramah pawh a kilkhawr ber, doctor, thawktu leh damdawi nei chhe ber pawl kan ni chungin, sorkar thu leh inkaihhruainate thuawih takin kan zâwm a, Covid vanga thi tlem ber kan ni," a ti.
Chief Minister chuan, Mizote thuawihnain rah ṭha a chhuah avangin sorkar laipuia hotute'n Mizoram an fak ṭhin thu sawiin, thuawihna chu chhawm nung zel turin mipui a chah a ni.
Kut thlengtu R Lalzirliana, Art & Culture minister chuan, Chapchar Kût chu Zo fate kût neih zinga ropui ber leh mi tin huap a nih thu a sawi a, "Intodelh lo leh ṭang rual thiam lo hnam apiangin ral lam an pan ṭhin. Chuvangin, kan kût hman hi intodelh tuma thuawihna, ṭan rualna leh inunauna ṭha min zirtirtu atan i hmang ang u," tiin mipui a sáwm.
Central YMA president Vanlalruata pawhin inlawmna thu sawiin, Covid-19 avanga kum dang anga Chapchar Kût lawm theih a ni lo chuan a hlutzia a tilang thar tih a sawi.
Vanapa Hall-a Chapchar Kût hmanna hian hun a awh rei lo a, thusawi bakah, hlado, zaipawl, malzai leh Cheraw pakhat ṭheuh chiah a awm. Vanapa Hall-a hun hman zawh veleh TV-ah virtual programme hman zui niin, Chapchar Kût puala thil chi hrang hrang tih tawh sa (record)-te chu TV-ah tihchhuah a ni.
Chapchar Kût hi district khawpui dangah pawh hmang an awm rualin, uar taka hman a ni lo.