COVID-19: Mizoram dinhmun Hripui vei mi 1 hmuh belh a ni

March 4, Ningani khan Mizoramah Covid-19 vei mi pakhat hmuh chhuah a ni a, nimin khan hripui laka fihlim tawh mi pali chhuahtir an ni thung.

Covid-19 vei hmuh thar pakhat chu RAT hmanga hmuh chhuah niin, Mission Vengthlanga hmeichhia kum 23 mi a ni a; Delhi aṭanga haw, Lengpui Airport screening point-a swab sample endiknaah hmuh chhuah niin Covid-19 sympom nei a ni.

Hripui laka fihlim tawh, enkawlna hmun aṭanga nimina chhuahtir mi palite chu SRH-ZMC aṭanga chhuak mi pathum leh Lunglei Zobawk CCC aṭanga chhuak mi pakhat an ni.

Mizoramah Covid-19 vei mi 4,428 hmuh chhuah a ni tawh a, mipa 3,230 leh hmeichhia 1,198 an ni. Nimin tlai dar 5 thleng khan mi 4,404 (99.46%) chhuahtir an ni tawh a, mi 10 (0.22%) thi tawhin, enkawl mek mi 14 (0.32%) an awm.

Ningani khan ZMC laboratory-ah swab sample 40, TrueNAT-PCR hmangin Champhaiah sample paruk leh RAT hmangin district 10-ah sample 969 endik a ni a, a vaiin sample 1,015 endik niin, chu'ng aṭanga Covid-19 positive hmuh chhuah pakhat chu 0.09% a ni.

March 4, 2021 thlenga Mizorama swab sample endik tawh zat chu 2,36,334 a ni a, chu'ng aṭanga Covid-19 positive hmuh tawh zat 4,428 chu 1.87% a ni. Mizoram páwnah sample 58 endik niin, ZMC laboratory-ah sample 1,01,256 endik a ni a, TrueNAT-PCR hmangin sample 20,253 leh RAT hmangin sample 1,14,767 endik a ni tawh bawk.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,653 hmuh chhuah a ni tawh a, TrueNAT-PCR hmangin 673 leh RAT hmangin 1,101 hmuh chhuah a ni tawh.

Hripui vei hmuh tawh zinga mi 2,112 chu Mizoram chhunga kái chhâwng an ni a, mi 2,316 chu Mizoram páwn aṭanga an rawn luh hnua hmuh chhuah an ni thung.

Tun dinhmunah Mizorama hripui vei enkawl mekte chu civil mi vek an ni a; district 11 zinga pasarih - Lunglei, Siaha, Kolasib, Serchhip, Lawngtlai, Khawzawl leh Hnahthial district-ahte Covid-19 vei an awm tawh rih lo.