PHE-in tui an pump tam thei lo

Aizawl khawpui tui lâkna tura mamawh kawlphetha hmuh ṭhat loh avangin tui pump tam thei a ni lo a; PHE department chuan, tuia harsatnaah mipui hriatthiamna an ngen rualin, tui ren turin an ngen nghal.

PHE department chuan thuchhuah siamin, Aizawl khawpui tan PHE department-in ni tin tui litre nuai 175 vel a pe ṭhin tih an tarlang a, "Hei hi mipui nuai 4 velin kan ring a ni. Tlawng lui aṭanga Aizawl tui pump chhuah nan Power & Electricity department aṭangin electric power lak a ni a, power supply awm loh chángin diesel khawl hmangin tui pump ṭhin a ni. Diesel khâwl chakna hian electric khawl chakna chanve chauh a neih avangin tui pump chhuah a tam thei lo," an ti.

February 23, 2021 khan tui pump kháwl châwmtu P&E transformer lian, Luangmuala mi chu a chhiat thu tarlangin PHE department chuan, "Hei vang hian tui pump chhuah a tlahniam nasa a, ni tin litre nuai 37 velin a tlem phah. Theihtawp chhuahin khawl thara thlak turin hna thawh a ni a, hun eng emaw chen a duh dawn. Hemi chhung hian diesel leh electric power awm thei ang ang hmanga tui pump zel a ni," an ti a; tui awm ang ang sem zâi a ngaih thu an tarlang a ni.