Mizoram sorkarin ramria a pawmah Pillar a awm leh awm loh a hre lo

Home minister Lalchamliana chuan ZPM member Andrew H Thangliana zawhna ziaka chhángin, Mizoram sorkarin ramria a pawmah boundary pillar (ramri chhinchhiahna lungphun) a awm leh awm loh hriat a nih loh thu Assembly session neih mekah a tarlang.

Mizoram sorkarin Assam leh Mizoram inrìnaa Mizoram china a pawm zawhna chhángin Home Minister chuan, "July 8, 2019-a Council of Minister ṭhukhawm chuan Mizoram leh Assam ramria a pawm chin chu Bengal Eastern Frontier Regulation (BEFR), 1873 (Regulation of 1873) behchhana siam notification No. 2299 P dt. 20.8.1875-in a huam chin a ni," a ti.

Lalchamliana chuan, Mizoramin ramria a pawm chinah hian a tìr lamah boundary pillar 46 phun a nih thu ziahna document a awm thu tarlangin, "Heng boundary pillar 46-te hi December 1984 pawh khan ṭha taka a la awm thu ziah lan a ni," a ti a; tunah erawh chuan boundary pillar-te chu a la awm leh awm loh hriat a nih loh thu a tarlang.

Mizoram china sorkarin a pawm tichiang turin map siam tumna a awm leh awm loh zawhna Home Minister-in a chhàn danin, Bengal Eastern Frontier Regulation (BEFR), 1873 (Regulation of 1873) behchhana siam notification No. 2299 P dt. 20.8.1875-in a huam chin chu zir chianna atan toppo sheet-ah rìn a ni tawh a, map siam tumna erawh a awm rih lo a ni.