Lalduhoma bàn hi Serchhip bial mipui hremna a ni - K Sapdanga

ZPM vice president K Sapdanga chuan nimin khan Serchhip Press Club-ah thuthar thehdarhtute a kâwm a; MLA aṭanga Lalduhoma bàn a ni chu Lalduhoma hremna ni loin, Serchhip bial mipui hremna a nih thu a sawi.

K Sapdanga chuan, tunlaia Assembly budget session neih mekah MLA-te'n ram pum hmasawnna an ruahman rualin, mahni bial hmasawnna tur ṭhahnemngai takin an buaipui tih a sawi a; Lal­duhoma erawh chu MLA aṭanga bàn a nih avangin Serchhip bial aiawha Assembly House-a ding tur a awm ve tak loh thu a sawi a ni.

Lalduhoma chu hrem­na an pe a ni satliah lo tih sawiin K Sapdanga chuan, "An hrem tak zawk chu Serchhip bial mipuite a ni. Bial mipui hmuhsitna, ngaihnêpna, kum khat chhung hmasawnna tur tihbahlahna a ni tih hi bial mipuite'n kan hai lo. Pu Lalduhoma bàntir a nih chhan an chhuanlam chu a bàntirtute ngei pawhin mak an la ti reng a ni ang, tun thlengin tu'ma zawh loh pawhin an la hrilhfiah a ni," a ti.

ZPM Vice President chuan, Lalduhoma chu amah thlangtute uirèsan a, páwl danga pakàite hremna dan hmanga hrem a ni tih sawiin, "Hrem­na thu puangtu khan hrehawm a tih hmèl hle a, a hmél aṭang khan tihluih­tirtu an awm a ang a, nawrna na tak a awm angin a chhiar theih bawk. Pu Lalduhoma hian amah thlangtu mipui a uiresan em? Páwl dangah a pakaisan em? An puhna hi Serchhip bial mipui hian dik kan ti em?," a ti a; amah thlangtute a phatsan leh phatsan loha thutlukna siamtu tur chu Serchhip bial mipui an nih thu a sawi.

Lalduhoma hremna petu páwlte'n law court lama kal turin an vehthlêm tih sawiin Sapdanga chuan, "Thutlukna siam turin law court aiin bial mipui kan ring ta zawk a ni," a ti a; by-election neih a ngai dawn ta tih sawiin, "By-election awm turah hian Serchhip bial mipuite'n hmangaihtu leh hrêk duhtu kan bûk dawn a nih hmel," a ti.

K Sapdanga chuan, MNF sorkar hotute thutlukna chu mipuiin by-election hmain theihnghilh hman se an duh nia a lan thu sawiin, "Election Commission-ah Mizoram sorkar a la inpeih loh thu sawiin, by-election hi a theih chen chen tikhawtlai turin rawtna an thlen tih thâwm kan hria a, kan chhui mek. A rei thei ang ber bialtu nei loa awmtir tumtute hian he bial hi an duatin kan ring em," a ti a; inhmuhsitnaa an ngaih thu a sawi.

ZPM Vice President chuan, MLA inthlanpui awm leh hunah chuan Serchhip bial chu chief minister bial a nih ngei an beisei thu sawiin, chumi tur chuan Serchhip bial mipuite chu ṭan la turin a sáwm a; "A satute ngeiin tuna i ropuina lêt sang sawm thumin an rawn thlêm ang che, i hnehna puanzar leh i lu i lo thinsan dawn nia," tiin Serchhip bial mipuite a chah a ni.