KHAWTHLIR

UDPA changtu deputy chief minister Tawnluia chuan Assembly session-ah INC member Zodintluanga Ralte zawhna ziaka chhangin, K-deposit hmanga sum dahte pek chhuah (release) dil mek a nih avangin February 9, 2021 thleng khan contractor bill pek loh cheng vbc. 10.63 a awm thu a tarlang. 

Covid-19 vei vanga State Referral Hospital-a enkawl ṭhin mipa pakhat, Aizawla mi chu March 4, Ningani zan dar 6:20 khan a thi a, damdawi-ina awm lai ni mah se, Covid-19 negative tawh a nih avangin Covid-19 vei thia chhiar a ni lo. Thu dawn danin, mitthi hi hun eng emaw chen ICU-ah ventilator nen enkawl a ni a, swab sample endik nawnnaah a negative tawh avangin tun hnai khan ICU Extension-ah dah a ni.

Khawzawl DC Zothanmawia kaihhruaiin March 4, 2021 khan DC conference hall-ah sorkar hotute'n Juvenile Justice Act, 2015 hnuaia naupang ṭanpui ngai leh venhim ngaite chungchang an sawiho. JJ Act hnuaia mipui hriat tur pawimawhte chu zau taka thehdarh an rêl a; an district-a JJ Act hnuaia ziah luh naupangte dinhmun mumal taka chhinchhiahna siam a, an chanvote an dawn ngei theih nan line department dangte nen thawhho ni se an ti. 

Nimin khan State Referral Hospital-ah Covid-19 vei mi pakhat dah luh a nih laiin, hripui laka fihlim tawh mi pahnih chhuahtir an ni a, mi pariat an awm mek. SRH-ZMC Bulletin tarlan danin, Covid-19 vei vanga enkawl mek mi pariatte chu Isolation ward-ah awmin, harsatna lian tham an nei lo a; an zingah kum 60 chung lam pakhat leh naupang kum 14 hnuai lam pathum an tel. ZMC laboratory-ah nimin khan swab sample 37 endik a ni a, March 4 leh 5-a lakte a ni.