SEDP kan kalpui dawn chauh - Dr Thangtea
Dr R Lalthangliana, Health minister chuan, Covid-19 avangin MNF sorkar flagship programme SEDP chu an duh angin kalpui thei rih lo mah se, an la kalpui dawn chauh thu a sawi.
Nimina North Chaltlanga MNF V/C lawmnaah thu sawiin Dr R Lalthangliana chuan, "Kum khat chhung Covid vangin sorkar kan kal hlei thei lo a, chuti chungin CM-in theihtawp min chhuahpui zel. SEDP pawh kan kalpui dawn ṭan chauh a, mahse, kan tum angin hripui avangin kan kalpui hlei thei ta lo a, theihtawpa bul ṭan ṭhat kan tum leh nghal a ni," a ti.
Dr R Lalthangliana chuan, health lam bikah sorkar hna ruak hrang hrang a tam hle nia sawiin, "Lâk mai tura kan tihte kha Covid vangin kan la thei ta lo a, ṭul bik thilah chuan sum kan nei thei hlek hlek dawn ta a ni. Cancer enkawlna tur super cancer speciality hospital, cheng nuai hlir nuai 50,000 sénga kan hmachhawp pawh a hlawhtling chho ṭan," a ti a; Health department chuan building leh quarters sakna tur Mizoram sorkar sum ni lo aṭanga hnuh chhuah zel an tum thu a sawi.
Health Minister hian Nisapui, Lungmuat leh North Chaltlanga health sub-centre, health & wellness-a leh mekte a tlawh a; thawktu indaih lohna leh mamawh dang an lo thlente chu a ṭul anga hmalakpui a tum thu a sawi. Sub-Centre-ahte hian PPE leh damdawite a pe nghal a ni.
Dr R Lalthangliana hian Sakawrhmuituai YMA Group Conference vawi 66-na, Lungmuat YMA Hall-a neih a hmanpui bawk a; Khamránga Zoram Mega Food Park leh Sairanga MIFCO Food Processing Plant a tlawh bawk.