KHAWTHLIR

Mamit Hmarveng Branch YMA chuan January 10, 2020-a an branch silver jubilee thleng tur pualin nimin khan an veng community hall-ah blood donation camp an huaihawt a, Mamit District Hospital tan thisen unit 52 an pe a, a petute mipa 33 leh hmeichhia 19 an ni.

Mizoram sorkar IPR department chuan tun hnaia Press Study Tour a buatsaih chu chhunzawm zel a ni a, nimin khan tun hnaia a vawi thumna atana tour-a kal tur MJA member pariatte leh IPR official pathumte Aizawl aṭangin an chhuak a, Finance secretary Ramchuana'n IPR Directorate kawt aṭangin a vailiam. IPR department hian nikum tawp lam khan Press Study Tour vawi hnih a buatsaih tawh a, tun 

ṭum Press Tour-a kalte hian Bengaluru leh Mysuru khawpuite an tlawh dawn a ni.

Aizawl DC Vanlalngaih­saka hoin nimin khan DC Conference Hall-ah kumin January 26-a Republic Day vawi 71-na lawm dan tur sawiho a ni. Sorkar hotute 

ṭhu­khawm chuan, kum­i­na Republic Day chu Pathianni-ah a tlâk avang­in kohhran inkhawm tibuai lo turin zing dar 7-ah Lammualah hman an rél a, mawhphurhna hrang hrang chang turte an ruat nghal. Republic Day-ah hian Governor khuallian a ni ang a, ceremonial parade-ah school contingent 14, armed contingent pasarih, NCC contingent pali, Scouts & Guides contingent pakhat ve ve, ex-servicemen contingent leh band party pali awm tura rel a ni.

MZP,  Tlabung chuan, sorkarin tun hnaia MCS officer a sîksawiah Tlabung SDO (Civil) Henry C Lalrawnkima chu sawn chhuah a ni a, a hna a zawm tawh laiin, Tlabung SDO (C) tura tih H Zonunmawia, Siahaa Election officer ni lai chuan a hna thar a la zawm lo tih an tarlang. Tlabung SDO turin a hna thar a la zawm loh chhan chu Saiha DC-in a la chhuahtir duh lo nia an hriat thu sawiin, "Hei vang hian Lungleia SDO(S) chu Tlabung SDO(C) mawhphurhna hlan rih a ni," an ti. Tlabung khawtlang hruaitute chuan nimin khan SDO(C) kal chhuak an thlah a ni.