Kan thupui ber central-a project siam - CM Tlachawp Budget; vision nei lo sorkar- Zodintluanga

March 3, Thawhlehni khan Assembly budget session-ah chief minister Zoramthanga department chan demand-te sawiho a ni. Chief Minister chuan, an thupui ber chu sorkar laipuia project leh plan siam a nih thu a sawi. Congress Legislature Party (CLP) leader Zodintluanga chuan, Mizoram budget chu tlachawp budget a nih thu a sawi a, budget enin sorkarin vision a neih loh thu a sawi.

CM chuan, Mizoram budget chu duhthusam a ni lo tih sawiin, "Central-in an tax hmuh tur tlingkhawm an beisei a phâk loh bakah, state pasarihin kan insem ṭhin kha state 14-in kan insem a, kan chan a tlem phah a ni. Chuti chung chuan, nikum aiin kan budget cheng vbc. 22 velin a la tam zawk. Kan budget hi sîksâwi ṭhin mah ila, tih tham tak tak a la ni. Kan thupui ber chu, central aṭanga plan leh project siam a ni," a ti.

Department-te tana mamawh ngei ngei tur an chhût chhuah hnuah a bak chu an chhùn khawm thu sawiin Zoramthanga chuan, "A ṭul ang zelin rawn sawi rawh u, kan hmang dawn nia kan ti. Hetiang hian nikum lamah pawh kan kal a, hlâwk kan ti khawp mai. Minister-te an department-ah  mamawhna an neih chuan sawi zel tura hrilh an ni," a ti a; minister ṭhenkhat chu an dil aia tamte pek a nih thu a sawi.

Chief Minister chuan, nikum lamah beisei aia tam sum an hman loh chhan chu, Delhi lam inpeih loh vang niin a sawi a, "June thla velah sorkarna an siam a, budget an ti ve a ni. Kan project a táng rei a, SMS (state matching share) kan hmang tam lo a, vbc. 400 lai a chuang. Mamawh ang zela inpe chhuak loin sem den den lo ila, a zo vek ang. Kan sorkar hmasak pawhin Finance ka chang tawh a, ka experience-ah chuan SMS atana dah thil dangah a zo zel. SMS neih loh vangin project a kal ṭha thei lo," a ti.

INC member Zodintluanga chuan, ṭum hnih budget pass tawhah hna thawhna tur a khawnpuiah dah ṭeuh a nih thu sawiin, "A ti thei deuhin an la chhuak tam a, lâk nachang hre lo minister-te'n ṭan an lâk a ngaiin ka hria. Nikumah budget kan pass a, kan hmanna turte kan hre lo. Supplementary demand a lo kal a, hmanna awm ṭeuh se," a ti a, sorkar kalphung chu ram tan a ṭhat loh thu a sawi.

Budget aṭangin department-te'n hmalakna tur an nei lo tih sawiin CLP Leader chuan, "Hei hian a ken tel chu, sorkar hian vision a nei lo tihna a ni. A khawnpuiah an dah ṭeuh a, minister thiam deuhin an lâk chhuah kha sorkar scheme a ni. Kan budget pass tur hian sorkar hnathawk hlawh, inrêlbàwlna leh a dangte bâk kan hmanna tur a khawih tel lo. Tlachawp budget tak tak a ni," a ti. Demand sawiho tàwp níah hian opposition group leader Lalduhoma chuan, state lottery dik lo taka kalpui a nih thu a sawi chhuak bawk.