Lawngtlai MJA-in conference an hmang
Mizoram Journalists’ Association (MJA), Lawngtlai district chuan nimin khan Lawngtlai Press CLub-ah Annual Conference an hmang a, Lawngtlai DC Dr Andrew H Vanlaldika'n a hmanpui. Bawrhsap chuan Myanmar aṭanga sahimna zawnga Mizorama lut an awm leh awm loh sorkarin a ngaihven reng thu a sawi.
Dr Andrew H Vanlaldika chuan, Lawngtlai district-in Myanmar nen ramri inṭâwm km. 97 a neih thu sawiin, "Ramri depa awm tlawmngai pawl leh VC-te chu ngun taka ramri boruak thlir tura tih an ni a, BDO tinte chu ráltlân an awm leh awm loh vil tura hriattir an ni. State sorkarah ni tin report thehluh a ni," a ti.
Covid-19 hri léng donaah Lawngtlai district-a tlawmngai pawl leh mipui ṭan rualna chu hlu a tih thu sawiin Andrew H Vanlaldika chuan, "Chanchinbumite'n boruak rih ber lai pawhin mahni invenna pawh nei mumal loin in che chhuak ṭhin a, hri do nana mipui kaihhruaina in thehdarh ṭhin hi a lawmawm tak zet a ni," a ti a; social media-a thu thehdarh kawngah chanchinbumite chu mi dang zirtirtu an nihna nasa zawka kalpui turin a chah.
MJA General Headquarters president Zonunsanga Khiangte chuan, Mizo journalist-te chu an hmazawnah an thawk rim hle tih sawiin, "Sorkar pawhin kutke berah a hmang ṭangkai hle," a ti a; MJA chhungkua chu chhungkaw hung tak, inlungrual tak an nih thu leh theihtawp chhuaha ṭan lâk zel a pawimawh thu a sawi.
Lawngtlai district MJA president Lalngheta Ralte pawhin thu sawiin, advertisement chu chanchinbumite ṭanpuinaa ngai an awm ṭhin chu pawi a tih thu a sawi a, "Advertisement hi mipui hriat tur chanchinbu kaltlanga puanzarna a ni a, sorkar pawhin tun aia nasaa chanchinbu a hman ṭangkai a ṭul," a ti.
MJA, Lawngtlai district Annual Conference hian resolution an siam a, Myanmar ram buaina vanga mipui tawrhna thleng chu pawi an tih thu te, chanchinbumite zalenna rapbet zawnga chêtna thleng ṭhin an dem thute an tarlang a; 'Kawlphethaa Lawngtlai leh Siaha châwmtu Chawnhu 33 KV Sub-Station hi 132 KV Sub-Station-a tilian turin sorkarin chak zawkin hma la rawh se,' an ti bawk.