MNF sorkar an rin tawkzia a lang - Tawnluia

MNF senior vice president Tawnluia, deputy chief minister chuan, AMC inthlanah MNF party-in sorkarna siam theia an chak chu Aizawl mipuiin CM Zoramthanga kaihhruai sorkar an rin tâwkzia tilangtu a nih thu a sawi.

MNF South-I Block-in nimina Republic Veng YMA community hall-a AMC Ward XVII-a councillor atana thlan tlin David Zohmangaiha an lawmnaah thu sawiin Tawnluia chuan, "CM Pu Zoramthanga kaihhruai mipuiin an rin tâwk avangin Aizawl khawpui tan hnathawh kawr min hâktir a ni. Mipuiin min beiseina leh kan rin Pathian hre reng chungin ram rawng i báwl zel ang u," a ti.

Tawnluia chuan, AMC councillor an la neih ngai lohna bialah MNF-in councillor an nei ta chu lawmawm a tih thu sawiin, "South-I bialah hian MNF-in MLA kan neih ngei theih nana ke pên ṭanna a ni. AMC enkawltu UDPA minister ka nihna angin Ward XVII councillor leh a bial hi ka thlahthlam dawn lo," a ti a; Ward-XVII mipuite chu councillor thar lakah inthlahrung lo turin a chah.

MNF adviser Robert Romawia Royte, minister of state pawhin thu sawiin, "Inthlan dawnah manifesto kan zuar a, kha'ng kan intiamnate tihhlawhtlin a nih theih nan ka dinna ngaiah ka la ding reng a ni tih bial mipuite'n in hriat ka duh," a ti.

Robert Romawia Royte hian nimin vêk khan Aizawl High School leh Central High School-te tan computer pasarih a pe a ni.