CM leh central Agriculture DDG inkâwm

Ministry of Agriculture deputy director general Dr Kumar Singh chuan March 4, Ningani khan chief minister Zoramthanga chu a chenna inah a kâwm a, Horticulture hmasawnna atana Mizoram mamawh leh hmalak theihnate an sawi dun.

Chief Minister chuan, agriculture leh horticulture lama thar chhuahah Mizoram a intodelh theihna tura ruahmanna an siam tawhte a sawi a, "Farmer-te sum lak luh a tam zawk theih nan leh kumtluana agriculture leh horticulture thar chhuah awm theih nan ruahtui khâwl lama hmalak leh geo-membrane hmanga tui dah khawlna uar zawka kalpui tum a ni. Hemi atan hian sorkar laipui puihna kan mamawh dawn," a ti. Hlâwk zawka buh leh bâl, thei leh thlai thar a nih theih nan khawl leh tunlai thiamna hman chungchanga hmalak dante a hrilh.

Dr Kumar Singh chuan, Mizoram chu a leilung, sik leh sá awm danin a zir avangin thei leh thlai hrang hrangah a intodelh theih tur thu a sawi a; kut hnathawktute tan training an pek theih thu te, sum chang thei leh thlai hlâwk zawka sumdawnna tura an thar theih nan hmalak dan turte a sawi bawk.

Inkawmnaah hian minister of state for Social Justice & Empowerment Pruthvirajsinh Bhatti private secretary te, additional chief secretary JC Ramthanga te, Horticulture director Elizabeth Saipari te pawh an tel a ni.