COVID-19 vei rinhlelh an la awm lo
Champhai chief medical officer Dr R Lalawmpuia leh medical officer Dr Samuel Laldinthara-te chuan nimin khan Zokhawthara khualzin, Myanmar aṭanga lutte'n Coronavirus (COVID-19) an vei leh vei loh endikna hmun an tlawh a, hnathawh dan leh thawktute dinhmun an enfiah. Endikna hmunah hian mi 327 enfiah tawh niin, COVID-19 vei rinhlelh an la awm lo.
Myanmar aṭanga Zokhawthar kaltlanga Mizorama lutte'n COVID-19 an vei leh vei loh enfiahna hi February 4, 2020 aṭangin Zokhawtharah ṭan a ni a, damdawi lam thiamte'n an ṭhutchilh. Chutih rualin, ramri hrûla khualzin, kal hla tur ni lo leh ramri kân narânte chu enfiah an ni lo a, Myanmar ram chhung hmun hla zawk leh China leh Singapore lam aṭanga kalte chu fimkhur leh uluk taka enfiah an ni.
Enfiahna hmunah hian Zokhawthar, Hruaikâwn leh Melbuk khuaa health worker thawk mek mi pathumte Ṭiau lui kama Zokhawthar police checkpost bulah an duty a, ni tin zing dar 9 aṭanga tlai dar 5 thleng an duty
ṭhin. Medical team an duty ṭan aṭanga nimin thleng khan mi 327 enfiah an ni tawh a, Conoravirus vei rinhlelh an la awm lo.COVID-19 vei rinhlelh an awm a nih chuan, an thisen la in, hmunpui lama endik tura thawn a ni dawn a; dah hranna tur pawh Champhai District Hospital-ah siam a ni tawh a, khum panga dah a ni.