KHAWTHLIR

Inrinni khan Civil Hospital, Aizawl Blood Bank-ah Mizoram PYD-in PYD Day pualin thisen unit 234 an pe a, petute mipa 177 leh hmeichhia 58 an ni a; KṬP, Luangmual Branch-in an kohhran hall-ah unit 41 an pe a, petute mipa 37 leh hmeichhia pali an ni. KṬP, Tuikual South Branch-in an din champha pualin Synod Hospital tan thisen unit 21 an pe a, petute mipa 20 leh hmeichhia pakhat an ni a; Centre for Women, Mahila Shakti Kendra, Kolasib-in International Women's Day pualin District Hospital-ah unit 19 an pe a, petute hmeichhia 11 leh mipa pariat an ni.

Isua Krista Kohhran (IKK) chuan Inrinni leh nimin khan Mizoram hmun hrang hranga pastor bial 15-ah bial inkhawmpui an hmang. Inrinni khan niléngin rorel a ni a, nimin chawhma leh chawhnu khan sermon inkhawm neih a ni.

February 23, 2021-a ṭan Assembly session chu March 5-7 chhung chawlh a nih hnuah vawiin chawhma dar 10:30 hian chhunzawm a ni dawn. Vawiin session-ah hian Finance changtu chief minister Zoramthanga'n kum 2021-22 budget tur a pharh sawihona hun hmáwrbâwk a ni dawn a, pawm nghal tum a ni ang.

YMA, Chaltlang Branch chuan thuchhuah siamin, an veng thlànmualah hmun âwl a tlem tawh avang leh daihzai taka hman a nih theih nan ruahmanna an siam thu an tarlang a, "Chhungte thlân hâi a, inphûm thuah a ngaih ṭhin avangin thlan siam nan thîr (iron rod) phana slab chhûn, granite leh sailungvar chhah leh hlai chi bakah, floor tile chhah chi hman khap a ni," an ti a; thlan siam turte chu YMA hruaitute hriattir hmasa turin an chah.

Minister of state Lalruatkima chuan March 6, Inrinni khan a bial chhung, Vaivakawn thlànmual aṭanga NH-54 kawngpui pawhtu tur motor kawng sial mek a tlawh a, hna thawktute chu fûr ruahtui tlâk hmaa thawk zo turin a chah. Minister hi bialtu coun­cillor Lalfakawma Chenkual leh khawtlang hruaitute'n an ṭawiawm a ni.