Khaw pathumah in pakua a kâng Ruallungah mi pakhat a kâng hlum

Nimin zing dar 4:30 vel khan Ruallung khuaa Bawihkima in a kâng a, in neitupa Bawihkima (73) chu a kâng hlum. Saitual aṭanga thu dawn danin, in hi Assam type,  chhawng a ni a, a chungah a neitute khawsain, a hnuai zawk chu furniture workshop a ni. 

In hi furniture workshop aṭanga kâng ṭan a ni a, a kan chhan hriat a ni lo. In a kâng tih an hriat veleh in neitute chhungkua mi 10-te chu an tlânchhuak vek a; a kan nasat hmain Bawihkima chu thil pawimawh lak tumin inah chuan a lut leh a, a kâng hlum ta a ni. 

Bialtu MLA R Lalzirliana chuan nimin khan Ruallung a pan nghal a; sorkar aṭanga chhawmdawlna awm thei angte ngaihtuah a nih tur thu sawiin, khawtlang hruaitute kutah Rs. 50,000 a pe nghal. 

Saitual additional DC Margaret Lalrinawmi Fanai-in Rs. 10,000 leh silpauline pathum a pe a; mi ṭhahnem takin ṭanpuina an thawh tawh bawk. Ruallung khawtlang chuan vawiin hian in sak ṭhat hnatlang neih an tum a ni. 

March 6, Inrinni chawhnu dar 1:30 vel khan Mamit district-a Khawhnai khuaah in pasarih a kang a, bungrua chuh hman loin a kâng ral vek a, mihring thi leh hliam an awm lo a, vawk pakhat a kâng hlum. 

Thu dawn danin, in pasarihte hi dái hnaia lo hâl aṭanga kâng ṭan nia hriat a ni a, in paruk chu luah lai niin, pakhat erawh chu luahtu an awm loh lai a ni. In kâng neitute chu - Tluanghmingthanga (member 5), Lalbiaksanga (member 7), Tluangsanga (member 5), Jeremia (in ruak), Lal­remmawia (member 6), Van­lalhlana (member 5) leh Lalhnema (member 2)-te an ni. 

Kângmei tuarte hi Inrinni khan bialtu MLA H Lalzirliana leh West Phaileng SDO(C) H Lalramliana ten an tlawh nghal a, ṭanpuina an hlân. 

Thingdawl khuaah pawh Inrinni zan, zanlai vel khan Hmarvenga Zohlunchhungi in a kâng a, bungrua chuh hman lohin a kâng ral nia thu dawn a ni. In kan chhan hriat a ni lo a, thi leh hliam an awm lo.