Langkaih YMA-in ramri chinfel an duh

Langkaih Group YMA chuan March 5, 2021 khan inkhawmpui an hmang a; an huam chhunga Mizoram leh Assam ramri buai laite a rang lama chinfel a nih theih nan na zawka chingfel tura sorkar nawr an rél.

Langkaih Group YMA rorel inkhawmah hian ramri chung changah agenda pahnih, 'Langkaih group huam chhunga Mizoram leh Assam ramri buai laite a rang lama min chinfelsak turin na zawka sorkar nawr ni rawh se' tih leh, 'Tuna kan ramri buai mek hi kan sorkar chak tak hian a rang lamin min chinfelsak vat rawh se' tihte a lut a; a pahnih hian kài kawpin an pawm a ni.

Inkhawmpuiah hian, Langkaih group huam chhunga Assam nena ramri buai laiah sipai dah nghet turin sorkar nawr ni rawh se, tiin an rél a; Zawlpui temporary IR border out post (BOP) hi permanent BOP a nih theihna atan Group YMA-in hma la rawh se, tih leh, ramri venga kan sipaite inkulhna hi fûrpui a thlen hmain sorkarin sa ṭha rawh se, tihte an rél bawk.

Zanah palai thlah inkhawm neih a ni a, khuallian, bialtu (Hachhek) MLA Lalrindika Ralte chuan, an bial hmasawnna atan theihtawp chhuah tura a inpek thu sawiin, "Chumi atan chuan kei chu ka tih theih chinah chuan ka tlanchhe lo ang. Chutiang ka ni lo a nih chuan in hmaa ding ngam leh chi ka ni dawn lo a, mi ṭha zawk kan zawnho a ṭul dawn tihna a ni," a ti. 

Inkhawm hi vice president Zonun­thanga'n a kaihruai a, khual­zahawm Zawlnuam BDO Andy Lalfakzuala Varte pawhin thu a sawi. Inkhawmpuiah hian Langkaih Group YMA hruaitu thar thlan a ni a, president-ah Zonunthanga leh general secretary-ah Lalnunthanga Colney-te an thlang a ni.