KṬP-in HIV/AIDS do zui zel an rêl

KṬP Rorel Inkhawm vawi 9-na chu March 6-7 chhung khan Chaltlang Kohhran biak-inah neih a ni a; HIV/AIDS dona chu kalpui chhunzawm zel an rél a, kum 2022-23 chhunga thupui atan 'Sual tinreng bul - Tangka sum ngainat' (I Tim. 6:10) tih an thlang.

Rorel Inkhawm hi Inrinni khan Central KṬP leader Rev. Vanlal­muanpuia Khiangte kaihhruaiin neih a ni a, rorel palai 236 an tel. HIV/AIDS dona kawngah KṬP chuan kum hmasa lam aṭangin hma an lo la tawh ṭhin a, an hmalakna chu hmalak chhunzawm zel an rêl a ni. 

Youth Recreation Centre (YRC) dinna atana KṬP member tinin pawisa an thawh ṭhin chu tihpun an rêl a; kuminah chuan Aizawla KṬP member tinin Rs. 80, district khawpui danga mite'n Rs. 50 leh khaw dang zawnga mite'n Rs. 30 an thawh tawh ang. YRC pual hian KṬP inkhawm vawi khat thawhlawm pek an rêl bakah, bial KṬP-te thawh tur budget tuk an rél bawk.

Covid-19 hripui lêng avanga harsatna tâwkte puala ram pum huapa ṭawngṭai rual an rêl a; Synod Hospital Charity Fund pual leh KṬP General Conference thlengtu puihna atan KṬP inkhawm vawi khat ṭheuh thawhlawm pek an rêl bawk. Kum 2023-a Rorel Inkhawm thleng turin Zemabawk Kohhran an thlang.

KṬP Rorel Inkhawmah hian Inrinni khan ro an rél zo nghal a, nimin khan chawhma leh chawhnuah Pathian biak inkhawm neih a ni. Zanah inkhawm a awm lo a, zâi a awm lo bawk.

KṬP-ah hian pastor bial 207-ah branch 883 an awm a, member 1,54,853 awmin, mipa 95,808 leh hmeichhia 59,045 an ni a; branch 833 zinga 49 chu Mizoram pawna mi a ni. Kum 2020 chhung khan KṬP member 422 thiin, mipa 354 leh hmeichhia 68 an ni a, kum 2020-a thi zat hi kum 2019-a thi aiin 34-in an tlem zawk.

Kum 2020 chhung vêk khan KṬP member nupui pasal nei 3,682 an awm a, chu'ng zinga 1,631 (44.30%) chu biak-ina innei niin, mi 2,051 (55.70%) chu hmun danga innei an ni.